Os Educadores Sociais ven "un agravio" que a nova convocatoria de acceso da Xunta "acepte outras titulacións"
Estudan "posibles accións" ante esta "inxustiza" para "tratar de revertela e impedir que volva suceder"
Por Europa Press / Redacción | SANTIAGO DE COMPOSTELA | 31/01/2024 | Actualizada ás 18:46
O Colexio de Educadores sociais de Galicia considerou "un agravio" e "unha discriminación" que a convocatoria do proceso selectivo para o ingreso pola quenda de acceso libre e de promoción interna na escala de técnicos facultativos na especialidade de educador social da Xunta "acepte outras titulacións" diferentes á súa, algo que, apuntan, "incide na calidade dos servizos socioeducativos".
"A única titulación que debe de ser admitida nun proceso selectivo de 'Educador Social' é a de Educación Social", sinalan desde o colexio, que indica que, aínda que esta opción era "xustificable" cando afectaba a persoas que, sen ter a titulación, poderían estar a ocupar postos de interinidade ou persoal laboral, neste momento "non é admisible" de face a "novas convocatorias".
Para estes profesionais, a Xunta "debería de dar exemplo na defensa do dereito da cidadanía a recibir unha atención especializada", así como "dos dereitos das persoas que investiron esforzo, tempo e diñeiro nunha formación universitaria oficial".
O colexio "leva anos reivindicando o recoñecemento" da súa figura profesional, "tanto na administración" como a nivel privado, lembran. Nestes momentos, engadiron, atópanse estudando "as posibles accións a desenvolver" ante "esta inxustiza" para "tratar de revertela e impedir que volva suceder". "Somos profesionais comprometidos loitando pola reivindicación da nosa figura, xa que a cidadanía ten dereito a contar con educadores sociais nos diferentes servizos e programas para ter as súas necesidades cubertas, recibir apoio e ter unha mellor calidade de vida e benestar social", apuntaron.
