Morre unha persoa e outras dúas resultan feridas graves tras unha colisión entre dous vehículos en Pantón

Unha persoa morreu e outras dúas resultaron feridas de gravidade tras producirse unha colisión entre dous vehículos na localidade lucense de Pantón, segundo informou Emerxencias 112 de Galicia.

En concreto o accidente produciuse na GC-2.1, en Santalla de Toiriz e ata o lugar desprazáronse os Bombeiros de Monforte que axudaron a liberar aos dous condutores que se atopaban atrapados dentro de senllos coches tras o impacto.

Ademais dos bombeiros interviñeron as Urxencias Sanitarias de Galicia 061, a Garda Civil de Tráfico, equipos de limpeza e mantemento da Axencia Galega de Infraestruturas e Protección Civil de Saviñao.

Imaxe de arquivo dun accidente de tráfico | Fonte: Garda Civil