Por E.P. | SANTIAGO DE COMPOSTELA | 12/02/2024 | Actualizada ás 10:55
O alumnado de Primaria de toda Galicia pode participar no concurso para deseñar a camiseta oficial de Galiciencia 2024 que se celebrará no mes de maio. O prazo para presentar as propostas, que deberán centrase na temática desta edición 'Mellor, de madeira', finaliza o próximo 18 de marzo.
Segundo informan os organizadores, Galiciencia -- feira promovida polo Parque Tecnolóxico de Galicia (Tecnópole) desde o ano 2006 -- busca achegar a ciencia á sociedade e, en particular, aos estudantes de Primaria, Educación Especial, Secundaria, FP e Bacharel.
A edición deste ano, o número 19, celebrarase o próximo mes de maio desenvolvida en colaboración coa Consellería de Economía, Industria e Innovación e a Fundación Española para a Ciencia e a Tecnoloxía, Ministerio de Ciencia, Innovación e Universidades. Ademais do concurso de proxectos, explican, este ano convocan o de deseño da camiseta oficial de Galiciencia 2024, certame dirixido ao alumnado de Primaria dos centros educativos de Galicia.
Os participantes poderán presentar un máximo de dous deseños por persoa, tanto de maneira individual como en grupo. Un xurado de expertos decidirá a proposta gañadora e faraa pública a través da páxina web e as redes sociais da feira.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.