Louzán, novamente ante a Fiscalía
A nova presidenta da Deputación de Pontevedra leva aos tribunais as posibles irregularidades do ex presidente durante o seu mandato na xestión de proxectos europeos. GC xa publicara as críticas e usos dos cartos da UE, entre eles, para medios de comunicación.
Por Galicia Confidencial | Pontevedra | 13/09/2015 | Actualizada ás 11:00
O ex presidente da Deputación de Pontevedra, Rafael Louzán, pode ter que volver visitar os tribunais. A nova presidenta deste organismo, Carmela Silva, anunciou que o denunciará ante a Fiscalía por posibles irregularidades na xestión de proxectos europeos por valor de máis de 35 millóns de euros.
"Eu non vou á asumir ningunha xestión irregular de ninguén", advertiu a presidenta ao suliñar que se tratan de actuacións que recibiron fondos europeos dos que hai que render contas tanto á Unión Europea como a outras institucións.
Trátase dos proxectos Pousadas do Salnés, DepuTrans, DepoTic e DepoGap, que suman máis de 35 millóns de euros de financiamento. Carmela Silva puxo como exemplo o caso de Pousadas do Salnés, unha rede de establecementos hostaleiros públicos (agora subcontratados), propiedade da Deputación. Este plan recibiu fondos europeos por 6 millóns de euros, pero finalmente a institución provincial gastou 14 millóns de recursos propios.
"Obrigouse a modificar créditos nos orzamentos para facer fronte á mala xestión e previsión", indicou Silva, que citou os demais proxectos dos que sospeitan, como Deputrans, un proxecto de depuradoras para municipios rurais.
Tamén apuntou a DepoGap, un sistema para auditar e inventariar os activos da Deputación a través de medios electrónicos, adxudicado este mesmo febreiro por 6,5 millóns a unha UTE entre Indra, Altia Consultores, e R Cable; e DepoTic, con 11 millóns de fondos europeos para potenciar o uso das novas tecnoloxías da información.
"As irregularidades en pagos incumben a recoñecementos extraxudiciais de facturas de forma continua, á marxe da correcta tramitación", precisou Silva.
GC xa publicara que Louzán estaba a utilizar cartos da UE para pagar publicidade nos medios de comunciación. Tamén o entón deputado provincial do PSOE, José Antonio Cacabelos, xa cualificara este proxecto como "o Gaiás do Salnés" e denunciara que o orzamento inicial do proxecto, de 9,6 millóns de euros, inflouse tras sucesivas modificacións técnicas até os 15.
