O Concello de Melide pide a declaración negativa de impacto ambiental para o proxecto de Altri
O alcalde, José Manuel Pérez, reclama que sexa revisada a categoría do proxecto estratéxico e de utilidade pública da iniciativa
Por Europa Press / Redacción | A CORUÑA | 18/04/2024 | Actualizada ás 18:50
O Concello de Melide solicitou á Xunta unha declaración negativa de impacto ambiental para o proxecto de Altri dunha fábrica de fibras téxtiles en Palas de Rei. Tamén solicita que se revise a categoría do proxecto estratéxico.
O rexistro municipal recolleu case 700 alegacións ata o 17 de abril. Agora, nunha misiva enviada á Consellería de Industria, o alcalde, José Manuel Pérez, de Adiante Melide, expón as alegacións do consistorio nos ámbitos do proxecto industrial, da afección territorial e urbanística e desde o punto de vista patrimonial e ambiental.
No seu escrito, reclama que sexa revisada a categoría do proxecto estratéxico e de utilidade pública da iniciativa, con base nas alegacións presentadas. Nelas, o concello reclama que a Secretaría Xeral de Industria facilite unha copia da documentación achegada durante a declaración do mesmo, así como dos informes favorables.
Tamén pide aclaracións sobre a instalación por fases que se expón no proxecto básico e as incidencias das mesmas sobre os postos de traballo. Ademais, quere unha aclaración sobre o carácter da instalación, "onde se expoña adecuadamente se se trata dunha fábrica de téxtiles ou de produción de celulosa".
Na mesma liña, pide coñecer "como encaixa" nas directrices de ordenación do territorio "o monocultivo de eucalipto que necesita a subministración do proxecto".
