Os detidos da 'Operación Vodka' fornecían motores de narcolanchas a grupos do Estreito
O balance ata a data é de seis detidos, tres na provincia de Ourense e outros tres na provincia de Pontevedra.
Por Europa Press / Redacción | OURENSE | 19/04/2024 | Actualizada ás 20:42
A Garda Civil e a Axencia Tributaria desarticularon unha organización criminal galega que fornecía motores e narcolanchas a grupos do Estreito de Xibraltar, nun operativo que recibiu como nome 'Operación Vodka'. O comandante xefe da Garda Civil de Ourense, Rafael Berguillo, compareceu acompañado de Jaime Gaya, xefe rexional de Aduanas da Axencia Tributaria, e Juan José López Castro, capitán da Unidade Orgánica da Policía Xudicial da Comandancia da Garda Civil de Ourense.
"Trátase dunha organización de orixe galega. Poderiamos dicir que unha das máis importantes desde o punto de vista da súa actividade delituosa", afirmou Berguillo, que informou de que se dedicaban ao "branqueo de capitais, así como a fabricación de narcolanchas para organizacións que están vinculadas ao narcotráfico no Estreito". O balance ata a data é de seis detidos, tres na provincia de Ourense -- dous na capital e un no Concello do Carballiño -- e outros tres na provincia de Pontevedra, entre os concellos de Ribadumia e Tui. Todos eles teñen nacionalidade española. Ademais hai cinco investigados.
Así o fixo saber o capitán da Unidade de Policía Xudicial da Garda Civil de Ourense, indicando que a operación se iniciou na cidade das Burgas "tendo en conta que os principais responsables da organización criminal residían en Ourense". En canto á operación, debullou que levaban traballando nela desde finais do 2022 e estaba aberta desde o primeiro trimestre do ano 2023.
O que fixo sospeitar "foi o intercambio de información e material náutico, así como movementos económicos que coa colaboración da Unidade Operativa de Vixilancia Aduaneira de Ourense puidemos concretar", sinalou López Castro quen tamén expuxo que as narcolanchas non se ensamblaban na provincia, senón que "os indicios" apuntan a que posiblemente fora na nave de Valença do Minho.
López Castro indicou que a operación "non está pechada", sen concretar se haberá máis detencións, o que si dixo é que se observou que diferentes narcolanchas se empregaban no tráfico de droga e se atribúen aprehensións de máis de 4.000 quilos de cocaína e outros 4.000 de haxix.
Pola súa banda, o xefe rexional de Aduanas, Jaime Gaya, resaltou "a magnífica colaboración" entre Vixilancia Aduaneira e a Garda Civil ourensá e explicou como traballaba a organización a nivel financeiro para evitar ser descuberta. "O seu ánimo era ocultar en todo momento que os motores podían terminar no estreito. Tivemos que analizar 50 contas correntes, creadas por máis de 20 sociedades ficticias, unha detrás doutra", esgrimiu.
Neste sentido, explicou que mediante ingresos en efectivo de xente da organización "conseguían borrar o rastro do diñeiro". "Este era o seu ánimo, o branqueo de capitais, e isto dificultaba a investigación", dixo para trasladar que "os grupos do Estreito non compran directamente o motor, senón que o ocultan todo mediante unha armazón de sociedades ficticias".
"A modo de exemplo, en poucos meses estas contas tiveron movementos de máis de tres millóns de euros, de continuas entradas e saídas, para borrar o rastro que nos levaría a quen realmente estaba a adquirir os motores e as narcolanchas", expuxo Gaya, subliñando que "estamos a falar dun grupo que fornecía motores e narcolanchas a moitos grupos criminais do sur, polo que non podemos dicir se é a organización máis importante, pero si una das máis importantes na subministración para estes grupos".
Ademais dixo que "daban un servizo completo colocando o motor onde a organización solicitaba, por tanto non era un grupo menor" e insistiu en que estas lanchas se empregaban "para trafico de drogas e inmigración ilegal no Estreito".
Así pois, a Garda Civil subliñou que se trata de "un grupo de persoas cuns roles moi definidos, con tarefas moi concretas, fortemente xerarquizado, e permanente no tempo a fin de presuntamente cometer ilícitos penais", polo que, a maiores da organización criminal, "cremos que tamén se cometeu un presunto delito de branqueo de capitais e por suposto de tráfico de drogas" como "os principais feitos punibles que desde un punto de vista policial atribuímos".
A 'Operación Vodka' foi a segunda gran operación contra grupos de lancheros do Estreito desenvolvida polas forzas da orde ao longo da semana, despois da desarticulación da considerada como maior rede de narcotransportistas do sur da península. A 'operación Grajuela' pechouse cun total de 31 detidos, dous deles na provincia de Pontevedra, que ingresaron en prisión provisional por orde do xulgado de instrución de Sanlúcar de Barrameda tras prestar declaración vía telemática desde Cambados (Pontevedra) e Caldas de Reis (Pontevedra).
No caso da 'Operación Vodka', entre o mércores e o xoves practicáronse sete rexistros domiciliarios, catro deles en Ourense --a maioría na propia cidade--, dúas en Pontevedra e tamén un en Portugal, en concreto, na localidade norteña de Valença de Minho.
Os axentes incautaron 30.000 euros en efectivo, oito embarcacións, 25 motores de gran cilindrada, material náutico, radares GPS, antenas, documentación, computadores e terminais móbiles relacionados cos feitos delituosos.
