A CIG rexeita a fusión entre BBVA e Sabadell: "Só beneficia a fondos especulativos"
O sindicato tamén denuncia a redución da competencia e sinala que o sistema financeiro galego xa ten un grao de concentración moi elevado
Por E.P. | SANTIAGO DE COMPOSTELA | 02/05/2024 | Actualizada ás 20:32
A CIG mostrou o seu rexeitamento á fusión entre as entidades financeiras BBVA e Sabadell e asegurou que o modelo financeiro impulsado por Bruxelas só beneficia a fondos especulativos de Estados Unidos e aos directivos das entidades.
Nun comunicado, o sindicato nacionalista asegura que non hai fusións e avisa de que, cada vez que se concentra o negocio, procédese ao peche de oficinas e de sucursais e á destrución de empregos.
"Hoxe, a negociación entre BBVA e Sabadell céntrase nos grandes accionistas, na guerra de galos para decidir que persoal directivo continuará, e en calcular o número de persoas traballadoras que sobran", censurou a central nacionalista.
Así, a CIG avisa de que a fusión suporá pechar oficinas e restrinxir aínda máis os servizos financeiros á clientela e ao conxunto da sociedade, así como a destrución de miles de postos de traballo.
O sindicato tamén denuncia a redución da competencia e sinala que o sistema financeiro galego xa ten un grao de concentración moi elevado. Ademais, a nivel estatal, o tres grandes grupos bancarios (Santander, Caixabank e BBVA) controlarían case o 70% mercado financeiro.
