O 40% das persoas que fixeron a enquisa das nosas redes falan sempre en galego

Emprega a comunidade do Galicia Confidencial normalmente o galego? En que ámbitos? Como ve a situación da lingua? Lanzamos unha enquisa dirixida ás redes sociais, principalmente a Instagram e X, coa que procurabamos ter unha visión xeral e coñecer máis dos usuarios e usuarias que consumen o noso contido. Expoñemos ás principais conclusións tras os resultados. 

Coa finalidade de sacar conlusións globais, realizouse unha media entre as porcentaxes obtidas en ambas redes sociais. Así, normalmente, o 40% das persoas que responderon á enquisa falan sempre galego, o 15% fala sempre en castelán, o 30% fala máis castelán que galego e o 15% fala máis galego que castelán. Existe tendencia á coexistencia de ambas linguas. Cando consultamos en que ámbitos falan normalmente galego máis da metade (un 58,82%) recoñecen que coa familia, mentres que cos amigos (un 17,65%) e xa moi por debaixo no ámbito laboral (21,57%) e sorprende o dato do ámbito educativo (1,96%). Isto poderiase deber a que non moita xente da que respondeu está en etapa de formación. 

No ámbito social, un 42% fala sempre en galego; un 25% fala máis castelán que galego; un 13% sempre en castelán e un 19% máis galego que castelán. Por onde lle chega o contido en galego? A traves de que canles? Sinalan por maioría a través das redes sociais (65%), despois pola televisión (20%), seguida da prensa (15%) e en menor medida a radio (5%). Isto podería traducirse xa a vixente situación xeral de consumo. 

E o futuro da lingua? Como ven a situación? Coinciden nunha gran maioría en que cada vez se emprega menos o galego (60%), ou que se emprega pouco (26%). Só un 10% opina que se usa cada vez máis e un 4% sinala que se usa moito. Porén, os datos da seguinte enquisa son alentadores no que se refire ao futuro. Que lingua lle ensinarías aos teus fillos/as? O 67% non dubida en apostar polo galego, seguido dun 27% que optaría por ensinar ambas, tanto galego como castelán a un mesmo nivel; e coinciden nun 3% os segmentos que optarían por ensinar máis castelán que galego ou só castelán.