Por Amanda Fernández | Santiago de Compostela | 01/06/2024 | Actualizada ás 19:14
Comezaba o derradeiro venres do mes de maio coa segunda cita do festival O Son do Camiño, no monte do Gozo. Saían os buses lanzadeira desde diferentes puntos da cidade para chegar ata o recinto, que agardaba por outra gran e variada multitude, como na pasada xornada. O calor xa se facía notar aínda que non faltaba a circulación do nordés, que facía ondear máis dun peiteado e precisar máis dunha capa de roupa. Algúns foron máis previsores ca outros. O peor chegaría coa marcha do sol.
O punto característico deste festival, como cada ano, é que na variedade está o gusto, diferentes estilos musicais, perfís para que todo o mundo quede contento ou poida saír coñecendo novas propostas. Para abrir apetito dos asistentes ansiados de boa música, a triunfita Marilia Monzón abriu o cartaz no escenario Xacobeo. A continuación, o toque galego dos autores de temas como "Veranito en Jalisia" ou "Candela", Monoulious DOP. Pasando ao panorama musical español, seguiron mantendo os ritmos nas masas o rap de Recycled J e as mesturas sonoras propias de Judeline.
LA OREJA DE VAN GOGH: DOS MP3, CASETES, WALKMAN AO MONTE DO GOZO
Chegaba o momento máis agardado por moitas e moitos, para aqueles que medraron con esta banda sonora e aos que lles chegou máis tarde. Unha banda que traspasa xeracións tras xeracións e non pasa de moda, era a quenda de La Oreja de Van Gogh. Cancións como "20 de enero", "Pop" ou "Puedes contar conmigo", que nalgún momento se escoitaron nun Mp3, casete ou walkman, foron cantadas ao unísono, pero foi no tema "Rosas" onde máis se fixo notar a emoción. Leire Martínez parou de cantar por un intre para escoitar ao público entregado, con bágoas, con apertas, dedicatorias e sorrisos. Non faltaron tampouco os brillos, o brinde coas amigas e amigos e os móbiles para inmortalizar o momento.
La Oreja de Van Gogh | Fonte: O Son do Camiño (X)Ver esta publicación en Instagram
Una publicación compartida por Galicia Confidencial (@galicia_confidencial)
Co remate da súa vibrante actuación, no escenario Estrella Galicia, agardaba a mítica Love of Lesbian para os amantes do indie rock e indie pop. Paralelamente, desde as 19,00h, a música electrónica contou con varios expoñentes ata finalizar a xornada. O nivel non baixaba nin moito menos, pero a o sol seguía o seu curso natural. Algúns dos presentes expresaba o nerviosismo e as ganas por ver ao cantante e compositor portoriqueño, Myke Towers, autor de moitas das cancións que máis soan no panorama internacional do momento.
CAMISETAS DE FÚTBOL E LEOPARDO AO SON DE LALA
Myke Towers estaba preparado, marcaba o reloxo que pasaban das 21,00 horas, e xa estaba repleto o escenario Xacobeo. Todo listo para gozar do outro prato forte desta xornada, era o momento de escoitar os temas que acumulan máis bailes en Tik Tok, así como reproduccións nas plataformas musicais. Só en Spotify conta con 43,5 millóns de ouvintes mensuais e onte puxo a bailar e cantar ao Monte do Gozo ao ritmo de temas como "LALA", "La falda", "La Curiosidad", "Diosa" o "La playa del Inglés". Un cantante que pode presumir de ter grandes colaboracións sinónimo de éxito e que seguro fixo moi feliz a un neno que tivo a oportunidade de cantar con el.
E se nunha entrega falabamos das tendencias á hora de escoller estilismo, durante este concerto había un estilo ben definido. Elas apostaron polo leopardo, o metalizado, as transparencias ou moita cor, mentres que eles tiraron polas camisetas de diferentes equipos de fútbol, desde o Dépor ou Celta, pasando polo Inter de Milán, Fenerbahce turco ou un conxunto mexicano. Había onde escoller, iso seguro. Coa chegada do final de Myke a iso das 22,00 horas, xa o olor a comida abría o apetito. Unha proposta variada de foodtrucks fixeron as delicias dos asistentes, desde bocadillos, pizza a hamburguesas, non pasou fame ninguén.
A música non daba pausa e Pet Show Boys xa soaba no escenario Estrella Galicia, que tamén tivo o seu público entregado, como non podería ser doutra maneira. O vento xa se facía notar aínda con máis ganas e a opción de estar entre a multitude pasaba a ser cada vez máis apetecible. Moita xente se deu cita para ver a Natos y Waor, expoñentes do rap español, que non estiveron sós. Recibiron ao mencionado Recycled J, co que conforman Hijos de la Ruina, xerando un berro unísono que se fixo sentir. Viviuse con total entrega e paixón. Xa o final estaba preto e Icona Pop puxo son aos últimos compases.
O BROCHE DE OURO DESTA EDICIÓN
Durante este sábado haberá un cartaz de luxo e, de novo, con variados estilos. Mención especial a un representante de Galicia para o mundo, Baiuca, que seguro fará saltar a todo o Monte do Gozo. A continuación, chega unhas das cantantes españolas máis soadas da actualidade, que non é outra que Ana Mena, con temas como "Las 12" ou "Madrid City". Xa de ámbito internacional, Tom Odell emocionará co seu "Another Love" e Thirty Seconds To Mars, non deixará a ninguén indiferente. Iso si, para os máis nostálxicos e románticos, Melendi virá cargado deses temas que marcaron tamén xeracións e xeracións. Porén, parte do público, se cadra, botará de vez en cando unha ollada ao marcador da final da Champions League, que se disputa esta noite. Volve o rap para pechar con Rels B e a electrónica con Wade. E, ata o ano que vén!
¿Gústache esta noticia?Problemas cos comentarios?
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.
¿Gústache esta noticia?
- A volta ao cole: un imprescindible, que hai detrás de cada nome nos mandilóns?
- Dous feridos tras un choque entre tres vehículos na AP-9, ao seu paso por Redondela
- Atracan a punta de pistola unha nave de cereais en Vilaboa
- As mínimas ascenden en Galicia como antesala dunha xornada onde predominarán as nubes e os chuvascos
- Sáltase a orde de afastamento da súa exparella e trata de agredila sexualmente na casa na que residen os fillos en común
- Excarcerados dous condutores tras un choque frontal na N-634, ao seu paso por Vilalba