A hora da verdade para máis de 13.000 estudantes galegos: desde o martes enfrontaranse á última ABAU con modelo covid
A selectividade arrinca este ano co exame de Lingua Galega e os alumnos coñecerán as notas ao cabo dunha semana, o xoves 13.
Por Europa Press / Redacción | SANTIAGO DE COMPOSTELA | 02/06/2024 | Actualizada ás 11:00
Un total de 13.448 estudantes galegos, uns 600 máis que o ano pasado, están matriculados para participar entre este martes e este xoves (4, 5 e 6 de xuño) na convocatoria ordinaria da Avaliación do Bacharelato para o Acceso á Universidade (ABAU) en Galicia. Será o quinto e último ano que se celebre co modelo covid, que permite unha maior optatividade ao responder as preguntas, antes da reforma impulsada polo Goberno central e que entrará en vigor, en principio, en 2025.
Os exames do que antes se coñecía como selectividade congregarán a estes máis de 13.400 aspirantes (uns 13.000 polo modo ordinario, máis outros 452 que requiren necesidades específicas de apoio educativo) en 36 centros esparexidos nunha decena de localidades galegas. Ademais de en facultades das sete principais cidades (A Coruña, Santiago, Vigo, Pontevedra, Ferrol, Lugo e Ourense), celebraranse en institutos de Cee, A Rúa e Viveiro.
A maior parte dos estudantes acudirán a realizar as probas a Vigo (2.937), Santiago (2.856) e A Coruña (2.846). Tras estas, as sedes máis concorridas serán os campus de Pontevedra (1.325), Ourense (1.126) e Lugo (1.017), seguidas das comisións periféricas de institutos Vilar Ponte de Viveiro (219), Agra de Raíces de Cee (146) e Cosme López Rodríguez da Rúa (127), que buscan evitar longos desprazamentos ata as cidades.
Como todos os anos, en todas as localidades hai aulas especiais para os alumnos con necesidades de apoio (NEAE). A esta súmase outra sede a maiores que a Comisión Interuniversitaria de Galicia (CiUG) habilita no Colexio Santiago Apóstolo de Pontevedra, en colaboración coa ONCE, para os que necesiten un apoio máis específico ou que conten con algunha discapacidade (un total de 15). Alí terán todo o material e a asistencia que precisen.
NOVIDADES: ARRINCA CON GALEGO
A ABAU 2024 arrincará o martes ás 9.00 horas cunha presentación tras a que virá o primeiro exame, que este ano por primeira vez será o de Lingua Galega e Literatura, ás 10.00 horas. O segundo será ás 11.30, tras un receso de media hora, o de Primeira Lingua Estranxeira (xeralmente inglés, aínda que tamén se pode escoller francés, alemán, portugués ou italiano).
Polo xeral, os alumnos fan un total de sete probas ao longo das tres xornadas que dura a selectividade. Son cinco correspondentes á parte obrigatoria que, xunto coa media de Bacharelato, permiten obter ata 10 puntos; máis outras dúas de materias específicas (aínda que poden optar por examinarse de máis) que permiten subir nota, ata 14.
Os resultados, que os aspirantes coñecerán ao cabo dunha semana, o xoves 13, conformarán a súa nota de acceso coa que tentarán conseguir praza nunha universidade. Cabe lembrar que a táboa coas notas de corte que a CiUG publica todos os anos constitúen simplemente unha referencia, ao ser en realidade a cualificación da última persoa que accedeu a cada titulación o curso pasado. Por tanto, non é unha cifra fixa, senón que varía cada ano.
Outra das principais novidades será a posibilidade de escoller entre examinarse de Historia de España e Historia da Filosofía, como ocorría anos atrás e deixou de facerse. Tamén se poden facer as dúas probas se unha delas se inclúe na fase das específicas, aínda que en Galicia será pouco práctico porque non ponderarán á hora de escoller a titulación a cursar na universidade. Non entanto, pode ser que fóra da Comunidade si sexa útil.
ÚLTIMA ABAU DO MODELO COVID
A deste 2024 será a última ABAU que responderá ao modelo instaurado en 2020, coa irrupción da pandemia de covid-19, tal e como confirma a Europa Press o vicepresidente da CiUG, Pedro Armas. Desde fai catro anos, os exames ofrecen unha maior optatividade ao realizar os exercicios. A partir do ano que vén, a selectividade concibirase como unha proba "máis competencial" e con "diferente estruturas", tendo en conta as novidades que supuxo a nova lei educativa, coñecida como Lomloe, por exemplo coa instauración de novas materias e do Bacharelato Xeral.
En canto ao resto de aspectos da ABAU, "non hai especiais novidades" con respecto ao ano pasado. De novo pasaranse detectores de frecuencias para evitar tácticas de copia con dispositivos electrónicos. De feito, Armas aproveita para lembrar aos estudantes que "poden levar o móbil, pero debe estar apagado". Os protocolos tamén manterán algunha pincelada que naceu coa covid, como o acceso ás aulas, que será "diferenciado" por centros e "máis ordenado", así como a ventilación das estancias. Todas elas son pautas que "obrigou a pandemia e que chegaron para quedar", afirma o vicepresidente da CiUG.
O sorteo para determinar que exames e con que preguntas caerán a partir do martes celebrouse xa en semanas pasadas e xa se realizaron as 80.000 copias necesarias. Están custodiadas coa "máxima seguridade", destaca Armas. O martes á primeira hora todas as follas sairán en furgóns dunha empresa especializada en seguridade con destino a cada unha das comisións onde se realizarán as probas. En total, a ABAU implica de forma directa a un milleiro de traballadores.
