O responsable galego de Emigración viaxa a Arxentina: "Constatei que todo segue desenvolvéndose con normalidade"
Rodríguez Miranda desprázase ao país austral tras a crise diplomática aberta entre os gobernos de España e Arxentina.
Por Europa Press / Redacción | SANTIAGO DE COMPOSTELA | 04/06/2024 | Actualizada ás 13:50
O secretario xeral da Emigración, Antonio Rodríguez Miranda, atópase de viaxe en Arxentina para manter reunións con representantes da colectividade galega nas que percibiu que "todo segue desenvolvéndose con normalidade cotiá". Nun comunicado, o Goberno galego informou este luns da viaxe do seu responsable de Emigración, que se produce tras a crise diplomática aberta entre os gobernos de España e Arxentina.
"Constatei que todo segue desenvolvéndose coa normalidade do cotiá tanto para os galegos a título individual como para as entidades que os acollen", asegurou Miranda, como recolle a nota de prensa na que informa o encontro mantido co delegado da Xunta en Buenos Aires, Alejandro López, xunto a representantes da "colectividade galega" na capital arxentina.
Alí, Rodríguez Miranda destacou a colaboración que presta a Xunta a estas entidades conectadas coa diáspora galega, ás que agredeceu o seu traballo para a "preservación e promoción" da cultura galega no exterior. "O compromiso e a dedicación destas entidades son fundamentais para manter vivos os nosos lazos culturais e sociais, e para asegurar que a nosa comunidade no exterior siga prosperando", subliñou.
