9X.- Ana Miranda chama á participación nas europeas: "Mañá decídense temas fundamentais para Galicia"
A candidata do BNG pasa a xornada de reflexión no barrio vigués de Bouzas, coa súa filla e amigos.
Por Europa Press / Redacción | Santiago de Compostela | 08/06/2024 | Actualizada ás 14:33
A eurodeputada e candidata do BNG, Ana Miranda, fixo un chamamento á participación nas eleccións europeas que se celebran este domingo, día 9 de xuño, ao asegurar que "mañá se deciden temas fundamentais para Galicia".
"É moi importante ir votar porque se deciden cousas para comer, que producir, onde vivir, como comunicarnos como o resto do mundo e tamén se decide paz ou guerra", manifestou.
Ana Miranda instou ao pobo galego a mobilizarse de forma masiva e a dar unha "lección de democracia" para decidir a quen quere mandar a Bruxelas.
A candidata nacionalista fixo estas declaracións desde o barrio vigués de Bouzas, onde pasa parte da xornada electoral xunto á súa filla, amigos e veciños.
Miranda pasará a tarde en Cuntis, onde visitará o cemiterio no que están enterrados os seus pais, coa súa filla e amigos.
