Rescatado un pescador illado en Cabo Prioriño tras sufrir unha caída

O servizo de Bombeiros de Ferrol tivo que rescatar na tarde deste pasado domingo a unha persoa que quedou illada en Ferrol tras sufrir unha caída mentres pescaba.

Tal como informou o 112 Galicia, os feitos ocorreron minutos despois das 20.00 horas e foi un particular o que avisou aos xestores de urxencias.

Segundo explicaba, un home caera nunhas rocas cando estaba a pescar en Cabo Prioriño, sen que fose quen de saír da zona pola súa conta.

Unha vez no punto, os bombeiros rescataron á persoa, que foi atendida por persoal sanitario no lugar antes de ser trasladado ao hospital de referencia.

Faro do Cabo Prioriño en Ferrol | Fonte: Turismo de Galicia