Rueda a Besteiro sobre a gratuidade da AP-9: "Se o conseguimos, serei o primeiro en aplaudilo"
O líder do PSdeG pídelle tamén a gratuidade dos tramos de autoestrada de titularidade da Xunta.
Por Europa Press / Redacción | SANTIAGO DE COMPOSTELA | 12/06/2024 | Actualizada ás 12:08
A activación por cuarta vez no Congreso dos Deputados da tramitación da proposición de lei para o traspaso da AP-9 a Galicia tivo eco na sesión de control do Parlamento, onde o presidente da Xunta, Alfonso Rueda, anticipou a súa intención de expor a gratuidade da Autoestrada do Atlántico cando se reúna co xefe do Executivo central, Pedro Sánchez.
Así o manifestou, tras ser interpelado polo líder do PSdeG, José Ramón Gómez Besteiro, quen se reafirmou en que apoia a gratuidade da AP-9, pero "por coherencia" instou a Rueda a traballar para que tamén sexan gratis as autoestradas de titularidade autonómica --a AG-55 e a AG-57--.
Dar este paso permitiría, segundo o dirixente socialista, deixar de "dividir aos galegos entre cidadáns de primeira e de segunda". Así mesmo, emprazou ao mandatario autonómico a convocar a Comisión Mixta de Transferencias para pedir a titularidade da AP-9 en paralelo ao proceso lexislativo iniciado no Congreso, un paso que se deu no pasado (cando Alberto Núñez Feijóo dirixía a Xunta) e sobre o que Rueda non se pronunciou.
Iso si, na súa resposta, o presidente galego afeou que o ministro de Transportes, Óscar Puente, "deixou co cu ao aire" ao dirixente socialista no que respecta á súa promesa electoral da gratuidade --ao afirmar que o rescate da infraestrutura, cuxa concesión está en mans de Audasa, era "inviable, improcedente e inasumible" polo seu custo económico--.
Pero aínda así remarcou que el non vai esquecer o compromiso de Besteiro e mostrouse disposto mesmo a mostrar ao xefe do Executivo central a "gravación" na que Besteiro se reafirma. "Voulle a dicir que, ademais, non é só que vostede o dixese en campaña nun calentón ao ver as enquisas como última cousa desesperada", esgrimiu, antes de volver convidarlle a acompañalo a Madrid, como xa fixo nalgunha ocasión anterior.
"BICAR UNHA CABINA DE PEAXE"
O líder popular, quen tamén contrapuxo a conxelación das peaxes das autoestradas de titularidade autonómica coa alza das taxas da AP-9 e ironizou co "engano" de Sánchez ao BNG sobre este punto para lograr o seu apoio na investidura, defendeu que conseguir a gratuidade da Autoestrada do Atlántico sería "un logro de todos".
"Se o conseguimos, serei o primeiro en aplaudilo. Se quere vir comigo e conseguímolo entre os dous, e tamén se despois quere vir aquí e dar un bico a unha cabina de peaxe, eu aplaudireille", manifestou o xefe de filas do PPdeG, nunha referencia clara ao bico que estampou o líder socialista na locomotora dun tren Avril en probas no que Puente visitou Vigo o 5 de xaneiro.
