Sanidade anuncia a finalización este mes das obras na zona de partos do Materno Infantil de Ourense

O conselleiro de Sanidade, Antonio Gómez Caamaño, avanzou, no pleno do Parlamento galego, que este mes estarán terminadas as obras realizadas na zona de partos do Hospital Materno Infantil de Ourense.

Fíxoo en resposta a senllas interpelacións do BNG e o PSOE, con reproches por parte da deputada nacionalista Noa Presas e a socialista María del Carmen Rodríguez Dacosta sobre o estado do paritorio tras o derrube do teito en decembro, pero tamén sobre outras cuestións como a lista de espera nesta área sanitaria.

O titular de Sanidade expuxo que esta tarde comezará o traslado do equipamento e mobiliario cara á zona reparada co obxectivo de que "a finais desta semana estea de novo en funcionamento". Nunha intervención na que agradeceu a "paciencia" de profesionais e pacientes, remarcou o traballo levado a cabo con intervencións que, admitiu, estendéronse "máis do esperado".

Isto atribuíuno, entre outras cuestións, a actuacións adicionais como a instalación de gases medicinais ou a adaptación dos circuítos internos. "Actuacións complementarias con todas as garantías", recalcou nunha exposición na que reivindicou os "investimentos cuantiosos" para mellorar a atención hospitalaria na área de Ourense. "A solución virá pola súa reforma integral, xa programada e orzada", engadiu sobre o Materno-Infantil.

Pola súa banda, a deputada nacionalista Noa Presas reclamou un hospital "do século XXI e non de fai tres séculos" e considerou que a Xunta "se puxo as pilas" ante a pregunta prevista no pleno. "Seis meses vulnerando os dereitos das mulleres en Ourense", aseverou sobre a situación deste paritorio e cualificando de "violencia obstétrica" o vivido por elas pola situación das instalacións.

Á súa vez, a socialista María del Carmen Rodríguez Dacosta asegurou que a situación é "límite" na área sanitaria de Ourense por "unhas condicións inaceptables para unha atención de calidade". "Falta planificación", argumentou.

O conselleiro de Sanidade, Antonio Gómez Caamaño, nunha resposta no Parlamento galego | Fonte: XUNTA