A Xunta enxalza o compromiso ambiental da comunidade educativa que achegou o 13% das pilas recollidas en 2023
Do preto de 316 toneladas en todo Galicia.
Por Europa Press / Redacción | SANTIAGO DE COMPOSTELA | 12/06/2024 | Actualizada ás 15:30
A conselleira de Medio Ambiente e Cambio Climático, Ángeles Vázquez, remarcou o compromiso ambiental da comunidade educativa tras achegar, ao amparo do concurso Pilabot, o 13% das preto de 316 toneladas de pilas recollidas en 2023 en todo Galicia.
Durante a entrega de premios aos gañadores da quinta edición deste concurso de recollida de pilas, Anxos Vázquez destacou que os 32.000 alumnos, de entre 6 e 16 anos, dos 150 centros de primaria e secundaria participantes nesta ocasión, recuperaron máis de 40.300 quilos de pilas, acumuladores e baterías usadas.
Neste sentido, a conselleira enxalzou "o relevante papel do profesorado" ao transmitir a importancia do coidado e do respecto ao medio ambiente, ensinar como xestionar os residuos que se xeran na vida cotiá e acompañar ao alumnado no proceso de aprender a protexer o noso planeta.
Ángeles Vázquez lembrou que ese alumnado tamén ten o labor fundamental de ser "os protagonistas do cambio" que permitan consolidar a resiliencia da comunidade contra o cambio climático ao avanzar cara a unha Galicia "formada e sensibilizada" nos valores de respecto e compromiso coa protección do medio ambiente.
"Sodes os verdadeiros embaixadores do medio ambiente e levades a cabo unha magnífica tarefa de sensibilización ambiental nos vosos fogares, nos vosos centros educativos e tamén no voso círculo de amizades", engadiu a conselleira.
GAÑADORES
Nesta quinta edición recolleron un total de 40.304 quilos destes refugallos, dos que máis de seis toneladas foron achegadas polos centros gañadores. Así, o CEIP Carmen García Castro de Cenlle levouse o primeiro posto en termos absolutos, ao recoller preto de 2,3 toneladas de pilas nas súas instalacións. Pola súa banda, o Colexio Plurilingüe Divina Pastora M.M. Franciscanas, de Ourense, foi segundo, con 2.183,44 quilos recolleitos.
Tamén entregaron os premios aos centros cos mellores cocientes de recollida por alumno. Neste caso, o gañador foi o CRA Amencer, de Ribadavia, con 47,41 quilos por estudante mentres que o CEIP Roberto Branco Torres, da Peroxa, recibiu o segundo premio despois de recoller 25,59 quilos por alumno.
O catro centros recibiron un premio económico que deben destinar á compra de material escolar ou deportivo. Concretamente, os primeiros premios de ambas as categorías están dotados con 2.500 euros cada un, mentres que os centros que quedaron en segunda posición levarán como recompensa 1.250 euros.
