O BOE publica a prórroga da suspensión de desafiuzamentos ata 2028
A prórroga do Real Decreto lei 1/2024 busca evitar a exclusión social de persoas que poderían perder a súa vivenda debido á subida das hipotecas.
Por Europa Press / Redacción | Santiago de Compostela | 19/06/2024 | Actualizada ás 10:53
O Boletín Oficial do Estado (BOE) publicou este mércores o acordo para prorrogar catro anos máis, ata 2028, a suspensión de desafiuzamentos da vivenda habitual, que se acordou tramitar como proxecto de lei, abrindo a porta a introducir cambios. Desta maneira, o BOE recolle o Acordo de validación do Real Decreto lei 1/2024, do 14 de maio, para prorrogar as medidas de suspensión de lanzamentos sobre a vivenda habitual para a protección dos colectivos vulnerables, un acordo alcanzado o pasado 13 de xuño no Congreso dos Deputados.
A medida procede do chamado 'escudo social' da pandemia e veuse ampliando periodicamente cos decretos anticrises. Esta última prórroga, que se estenderá ata o 15 de maio de 2028 e que afecta a supostos de "especial vulnerabilidade", foi aprobada polo Consello de Ministros un día antes de que caducase, para a súa entrada en vigor con urxencia.
A ministra de Vivenda e Axenda Urbana, Isabel Rodríguez, defendeu o texto desde a tribuna do Congreso o pasado 13 de xuño. Na súa intervención, explicou que a medida que aproba o decreto é necesaria nun escenario de incerteza sobre uns tipos de interese que poden encarecer o prezo da hipoteca. "O futuro segue sendo incerto, como recoñece o propio Banco Central Europeo cando sinala que non pode comprometerse de antemán a ningunha senda concreta de tipos", indicou Rodríguez. Neste sentido, a titular de Vivenda indicou que era necesario prorrogar a suspensión dos desafiuzamentos para evitar posibles situacións de exclusión social de persoas que podían verse abocadas a perder a súa vivenda se non poden afrontar a subida da hipoteca.
