Gran despregamento policial en Ribeira para reconstruír o suposto crime machista de Andrea Yturri
Por Europa Press / Redacción | Ribeira | 20/06/2024 | Actualizada ás 12:15
O home acusado de asasinar a súa exparella en Palmeira, no municipio coruñés de Ribeira, saíu este xoves de prisión para participar nunha reconstrución dos feitos, que aconteceron o pasado 19 de marzo.
A reconstrución coincidiu cunha concentración convocada por Mulleres en Acción da Barbanza, que reuniu ante a Igrexa de Palmeira, a escasos metros de onde se cometeu o crime, a familiares da vítima, amigos e veciños que lles mostraron o seu apoio.
Desde primeira hora da mañá despregouse en Palmeira a comitiva xudicial, que trasladou ao detido desde prisión ata o lugar do crime. Nela participaron efectivos de Policía Nacional, Policía Local e Policía Xudicial da Garda Civil, que cortaron o acceso na rúa Doutor Torres, onde tiveron lugar os feitos. Tamén empregaron un dron.
Os feitos ocorreron na tarde do pasado 19 de marzo, na vivenda na que residía a muller, Andrea Yturri, de 25 anos, que levaba un tempo separada do presunto agresor. O home acoitelou supostamente á vítima na casa e, posteriormente, causouse feridas a el mesmo, polas que tivo que permanecer ingresado no hospital. Ambos tiñan un fillo en común de pouca idade, que nese momento non estaba na vivenda
