A Policía Nacional homenaxea a vítimas do terrorismo en Galicia

O cuartel da Policía Nacional en Lonzas, A Coruña, acolleu este xoves unha homenaxe a vítimas do terrorismo en Galicia, nun acto con presenza do delegado do Goberno na Comunidade, Pedro Blanco; a subdelegada na Coruña, María Rivas, e o xefe superior de Policía na comunidade autónoma, Ramón Gómez Nieto. Nel, o delegado do Goberno apelou ao traballo desenvolvido durante décadas para combater a ameaza do terrorismo armado en Galicia e "o sacrificio máximo destes profesionais: o de dar a súa vida no exercicio da súa profesión e na defensa de España".

"Se hoxe vivimos en democracia e co grao de liberdade e tranquilidade do que gozamos, é polo esforzo de todos, pero en especial das Forzas e Corpos de Seguridade do Estado", expuxo nun acto no que trasladou o agradecemento ás familias. "Aínda que a súa perda non ten consolo, si conta co agradecemento infinito dunha sociedade que agora vive en paz grazas ao seu labor e á súa entrega", dixo nun evento con reivindicación tamén ao labor dos policías nacionais.

Nunha homenaxe "íntima e emotiva", en palabras do xefe superior da Policía en Galicia, púxose en valor o papel desta institución e dos seus integrantes coincidindo, ademais, co 200 aniversario da creación deste corpo. Unha conmemoración, dixo o xefe superior, que sería "incompleta se non se contemplase o recoñecemento de quen foron vítimas do terrorismo". "Temos unha débeda impagable convosco", dixo á os familiares sobre o que cualificou como unha "secuela".