Por Europa Press / Redacción | SANTIAGO | 20/06/2024 | Actualizada ás 14:04
Un total de 613 centros educativos galegos estarán adheridos a partir de setembro, co inicio do curso 2024/25, ao programa do libro dixital 'E-Dixgal'. Aínda que seguirán sendo máis da metade, serán 17 menos que durante o 2023/24, cando había 630. O Diario Oficial de Galicia (DOG) publicou este xoves a resolución da Dirección Xeral de Ordenación e Innovación Educativa cos colexios e institutos que contarán con esta iniciativa nalgúns dos cursos entre 5º de Primaria e 4º de ESO.
A listaxe confirma un descenso dos centros que operan con 'E-Dixgal' tras meses de polémica a raíz do goteo de colexios que decidiron desanotarse. Por este motivo, representantes da Consellería de Educación realizaron varias roldas de contacto con directores e asociacións de nais e pais. Ademais, prodúcese unha importante baixada nos centros que son de nova incorporación ao libro dixital. Se o ano pasado foron un total de 35 os que empezaron a empregalo ou o ampliaron a máis cursos, o próximo haberá cinco novos.
En concreto, incorpóranse a 'E-Dixgal' a partir de setembro o CEIP Plurilingüe Celso Currás de Trabada (Lugo), o CEIP Vicente Risco de Cualedro (Ourense), o CEIP Plurilingüe Rodolfo Núñez Rodríguez de Vilardevós (Ourense), o CEIP Plurilingüe Ramón e Cajal de Vigo e o CPI Manuel Suárez Marquier do Rosal (Pontevedra). Por tanto, tendo en conta a listaxe do ano pasado (630) e os que se van a incorporar (6), pódese deducir que se retiraron do proxecto 'E-Dixgal' un total de 23 centros.
Cabe lembrar que o próximo curso entrará en vigor o novo contrato do libro dixital que aprobou o luns o Goberno galego, por case 10,3 millóns de euros. O contrato, que contará con algunhas novidades como máis contido impreso, durará dous anos prorrogables por outros dous.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.