Detidos en Ourense dous irmáns por dedicarse supostamente á distribución de cocaína

O Grupo de Estupefacientes da Brigada Provincial da policía xudicial de Ourense, no marco dunha investigación contra o tráfico e distribución de estupefacientes na capital ourensá, levou a cabo a detención de dous irmáns que se dedicaban supostamente á adquisición e ocultación, para a posterior distribución e venda de cocaína.

Segundo informou a Comisaría Provincial, o inicio da investigación remóntase a novembro do pasado ano cando os integrantes do Grupo de Estupefacientes, no marco doutras investigacións contra o tráfico de drogas, detectaron a presenza de dous individuos que podían estar a actuar como intermediarios no tráfico das devanditas sustancias.

Durante a operación, ademais das detencións, practicaron dúas dilixencias de entrada e rexistro nos domicilios dos dous investigados, así como nun garaxe propiedade dun deles. Como resultado, interviñeron gran cantidade de cocaína en diferentes formatos, diñeiro en metálico, así como materiais e útiles para a distribución da droga. Ademais, levou a cabo a intervención de tres motocicletas de gran cilindrada e tres vehículos de alta gama.

O arresto, a intervención da cantidade de drogas, así como dos útiles para a súa venda e dos vehículos utilizados supón a desarticulación dun importante punto de ocultación, distribución e venda de sustancias estupefacientes en Ourense, subliñaron fontes policiais. Os detidos e as dilixencias foron postos a disposición do xulgado de instrución 2 da cidade.

Efectos intervidos a dous irmáns de Ourense detidos por tráfico de drogas.. POLICÍA NACIONAL | Fonte: Europa Press