Identificados os menores que esnaquizaron un cemiterio de Pantín

A Garda Civil investigou a tres veciños de Valdoviño, todos eles menores de idade, como presuntos autores de dous delitos, un de danos e outro contra os sentimentos relixiosos, polas desfeitas que realizaron no cemiterio de Pantín e no local social contiguo ao camponsanto durante a noite de San Xoán.

Tras ser informados destes feitos, os axentes da Benemérita desprazáronse ao cemiterio para constatar todos os danos, como a rotura de cristais e lápidas, así como tamén no mobiliario e a iluminación.

Un dos menores gravou os feitos e despois colgárono nas redes sociais. No vídeo podíase ver como rompían cristais e ornamentos de tipo relixioso mentres outros acirraban as desfeitas. "Dálle cun pau", escoitábase entre outros berros.

A análise de toda a información recollida respecto diso finalizou coa identificación plena, informa a Garda Civil, de tres menores de idade veciños de Valdoviño. Son investigados presuntos autores dun delito de danos e outro contra os sentimentos relixiosos.

Axente da Garda Civil / Garda Civil - Arquivo / Europa Press