Feridas dúas persoas nun accidente de tráfico en Sada

Unha colisión entre dous coches deixou este mércores dúas persoas feridas no municipio coruñés de Sada. Os bombeiros liberaron a un dos condutores implicados, que foi evacuado xunto coa outra persoa ferida ao centro hospitalario de referencia.

Segundo informou o 112, faltaban escasos minutos para as 10.30 horas cando o 112 Galicia tivo constancia deste accidente a través do persoal de Urxencias Sanitarias de Galicia-061. Acababa de rexistrarse unha colisión entre dous coches no quilómetro 5 da DP-5813, a estrada que conduce de Sada a Oleiros.

Cando chegaron, os servizos de emerxencias comprobaron que había dúas persoas feridas, e unha delas era incapaz de abandonar o vehículo polos seus propios medios. Os Bombeiros de Betanzos empregaron o seu material de excarceración para liberala. No operativo participaron, ademais dos medios sanitarios e dos bombeiros, a Garda Civil de Tráfico e os membros do Servizo Municipal de Protección Civil do municipio.

SAÍDA DE VÍA EN NEGREIRA

Tamén na provincia coruñesa, no municipio de Negreira, produciuse unha saída de vía, sen feridos. Si se rexistrou unha importante mancha de combustible que os equipos de emerxencias traballan para limpar.

Axente da Garda Civil de Tráfico nunha imaxe de arquivo | Fonte: GARDA CIVIL - Arquivo