Os traballadores das auxiliares do naval de Ferrol Sermicro e Artemisa reclaman o seu dereito á subrogación

Traballadores de Prosegur e mantemento informático (Sermicro e Artemisa) que prestan os seus servizos no estaleiro de Navantia Ferrol repartiron á primeira hora deste mércores nos accesos da factoría un comunicado no que reivindican unha serie de melloras, entre elas o seu dereito á subrogación.

Os empregados da compañía de seguridade insisten en que, como o resto dos operarios que desenvolven o seu traballo no interior do estaleiro, correspóndelles cobrar o "plus do naval" que contempla o convenio provincial siderometalúrxico.

Pola súa banda, os traballadores de mantemento informático (Sermicro e Artemisa) están inmersos na "loita" polo dereito de subrogación, así como por outras melloras que figuran no convenio provincial. Que todos os operarios que traballan no interior do estaleiro cobren ese "plus do naval" é unha demanda da comisión de auxiliares do comité de empresa de Navantia.

Nese sentido, os traballadores de Sermicro lembran que tiveron que afrontar sancións "por reunirse co comité de Navantia", aínda que, debido á presión da parte social, xa foron retiradas.

Desde a comisión de auxiliares esíxese tanto á compañía principal como ás subcontratas que "deixen de negar dereitos e roubar salarios aos traballadores e dean unha solución favorable ás nosas xustas demandas".

Entrada do estaleiro Navantia en Ferrol | Fonte: Europa Press.