Galicia, disposta a acoller a 26 novos menores migrantes de Canarias e Ceuta
A Xunta mostra a súa "solidariedade" na recepción de menores migrantes: "Galicia foi, é e será lugar de acollida"
Por Europa Press / Redacción | Compostela | 10/07/2024 | Actualizada ás 23:04
A Xunta de Galicia confirma estar disposta a acoller a 26 novos menores migrantes procedentes de Canarias e Ceuta tras participar na Conferencia Sectorial que aborda a situación e onde a conselleira de Política Social e Igualdade, Fabiola García, reivindicou a Galicia como "lugar de acollida".
O Goberno galego confirma así o seu voto a favor na reunión entre Goberno e comunidades celebrada en Santa Cruz de Tenerife para abordar a reforma da Lei de Estranxeiría para a repartición de menores migrantes non acompañados.
Con todo, a conselleira, que interveu por videoconferencia acompañada polo director xeral de Familia, Infancia e Dinamización Demográfica, Jacobo Rei, mostrouse moi crítica pola "ausencia" dunha política migratoria por parte do Executivo.
Ademais, demandou a convocatoria dunha conferencia de presidentes e esixiu financiamento por parte do Goberno para atender aos menores ata que abandonan o sistema de protección, ademais de solicitar garantías para que todas as comunidades autónomas participen na repartición.
Así mesmo, Fabiola García sinalou que o texto de reforma foi recibido este martes pola tarde e que o departamento "non tivo tempo suficiente para o seu estudo", na mesma liña na que se expresaron outras rexións.
De todos os xeitos, matizan, a conferencia sectorial non ten competencias sobre o mesmo, que reside nas Cortes, polo que non será sometido a votación.
Estes 26 menores súmanse aos 28 que Galicia aceptou recibir de Canarias en 2023, polos que aínda se atopa á espera e cos que completaba todas as prazas de acollida dispoñibles na actualidade.
