Os prezos da vivenda dispáranse un 21,3%, segundo os notarios
A galega é a comunidade que rexistrou o maior encarecemento do metro cadrado e a segunda onde máis creceron os préstamos
Por Europa Press / Redacción | SANTIAGO DE COMPOSTELA | 11/07/2024 | Actualizada ás 11:15
A compravenda de vivendas incrementouse en maio de 2024 un 14,6%, moi por encima da media estatal do 3%. Ademais, o prezo do metro cadrado creceu un 21,3%, o que representa o maior encarecemento das 17 comunidades autónomas.
Así se desprende da comparativa anual do Centro de Información Estatística do Notariado e difundida polo Colexio Notarial de Galicia, que sinala que a concesión de prestamos hipotecarios para a adquisición de vivenda incrementouse un 26,4% interanual, fronte ao 9,8% do conxunto de España.
En concreto, segundo os datos dos notarios, en Galicia o número de compravendas alcanzou en maio as 2.368 unidades. Por tipo de vivenda, producíronse 1.710 compravendas de pisos, un 19,2% máis que o mesmo mes de 2023, e 658 de unifamiliares, un 4,3% máis.
O prezo dos pisos aumentou un 12%, ata os 1.370 euros por metro cadrado de media, e o das vivendas unifamiliares, nun 25,6%, situándose en 826 euros por metro.
