Os prezos en Galicia creceron case un 21% en tres anos e a man de obra foránea un 30%
É o territorio co incremento de prezos máis altos de todo o Estado, só por detrás de Castela-A Mancha.
Por Europa Press / Redacción | Compostela | 16/07/2024 | Actualizada ás 11:50
Os prezos disparáronse en Galicia un 20,6% entre xaneiro de 2021 e xuño de 2024, o que supón a segunda maior subida de España, só por detrás do 21,5% de Castela-A Mancha, segundo o informe presentado por Funcas este martes.
En rolda de prensa, Funcas informou das previsións de crecemento por comunidades para 2024, onde Galicia crecerá un 2,4%, unha décima por baixo da media española do 2,5%. A previsión de paro é que se pechará o ano en Galicia no 8,7%, menos que o 11,2% do conxunto do estado. A media do conxunto da eurozona situarase no 6,5%.
Neste informe faise unha análise do impacto do crecemento da inflación por comunidades no acumulado desde 2021, con Castela-A Mancha e Galicia como as máis afectadas. Funcas chama a atención acerca dese incremento "non se corresponden" coas subidas de salarios, que crecen de forma uniforme en España, de modo que estas son as dúas autonomías cunha maior "perda de poder adquisitivo deste brote inflacionario". En contraste, a menor alza do IPC nese período rexístrase en Madrid (17,1%) e Cataluña (18,5%).
A preguntas das causas polas que comunidades como Castela-A Mancha e Galicia son as máis afectadas por esta subida de prezos, o director de Conxuntura de Funcas, Raymond Torres, apunta a que este diferencial "se debe a un problema de competencia" no sector servizos, pois "en parte encarécese levar produtos a determinadas zonas máis afastadas dos principais puntos de distribución". Así, indica que "o diferencial de IPC é o principal factor que vai explicar a diferenza en poder adquisitivo entre diferentes comunidades autónomas".
AUMENTO DE MAN DE OBRA FÓRANEA
Ademais, Funcas tamén expón que Galicia é a segunda comunidade na que máis crece a man de obra foránea entre 2021 e 2023, cunha alza da poboación activa estranxeira de preto dun 30%, só por detrás de Asturias.
Por outra banda, o informe recolle que Galicia é a comunidade na que máis creceu o PIB per cápita entre 2014 e 2022, un 15,9% máis --aínda que con datos de 2019 seguía por baixo da media, en metade da táboa--, así como a produtividade (6,6%). A taxa de ocupación subiu un 11,5% entre 2014 e 2022, menos que o 13% da media española.
Entre outras cuestións, Funcas reflexiona acerca de que o turismo se está achegando a un "punto de inflexión" en canto a crecemento en España, aínda que ve diferenzas entre comunidades como Galicia con máis capacidade de crecemento ao recibir agora "moito máis" turismo internacional respecto ao nivel xa alcanzando por outras autonomías como Baleares.
