Por E.P. | SANTIAGO DE COMPOSTELA | 23/07/2024 | Actualizada ás 20:59
Os dous ocupantes dun vehículo que se saíu da vía e caeu por un terraplén duns 30 metros no municipio pontevedrés de Ponteareas foron rescatados polos servizos de emerxencia e evacuados en ambulancia.
Segundo informou o CIAE 112 Galicia, varias chamadas alertaron deste accidente sobre as 17:00 horas deste martes. A primeira chegou por parte dun condutor que foi testemuña directa dos feitos: o coche de diante acababa de saírse da A-52, no quilómetro 293, á altura da parroquia de San Mateo de Oliveira, e de caer por un terraplén, entre as árbores.
Pouco despois, unha familiar sinalou aos xestores do CIAE-112 Galicia que recibira unha chamada dos propios implicados, que conseguiran saír do vehículo, pero descoñecían o lugar exacto no que se atopaban. Naquel momento trataban de alcanzar de novo a estrada a pé. De inmediato, solicitouse a acción de Urxencias Sanitarias de Galicia-061, do GES-SPEIS de Ponteareas, da Garda Civil de Tráfico, da Policía Local de Ponteareas e dos servizos de mantemento da autovía.
Pola súa banda, os membros do GES-SPEIS confirmaron que o turismo caera por un desnivel dun trinta metros e que axudaron a subir ás persoas accidentadas ata o lugar no que as esperaba unha ambulancia, que se ocupou do seu traslado ao centro hospitalario de referencia.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.