Entre espirais e figuras antropomorfas: o marabilloso patrimonio dos petroglifos de Teo

Na verde e serena comarca de Teo, na provincia da Coruña, atópase un dos tesouros arqueolóxicos máis fascinantes da rexión: A Ruta dos Petroglifos. Este roteiro convídanos a viaxar no tempo, ata o período da Idade de Bronce, cando os antigos habitantes da zona gravaron nas rochas as súas crenzas, soños e aspectos da súa vida cotiá. Os petroglifos de Teo son un testemuño mudo pero elocuente dunha civilización antiga que deixou a súa pegada na pedra para a posteridade.

A ORIXE DOS PETROGLIFOS

Os petroglifos son gravados rupestres realizados sobre superficies rochosas, xeralmente ao descuberto, que datan de entre o 2.500 e o 800 a.C. En Galicia, estas manifestacións artísticas son abundantes e atópanse en numerosos puntos da rexión. Os petroglifos de Teo destacan non só pola súa cantidade, senón tamén diversidade dos seus motivos, que inclúen formas xeométricas, espirais, círculos concéntricos e figuras antropomorfas e zoomorfas.

A RUTA

 

 

 

 

Ver esta publicación en Instagram

 

 

 

 

 

 

 

 

 

 

 

Una publicación compartida por Galicia Confidencial (@galicia_confidencial)

A Ruta dos Petróglifos de Teo está deseñada para ofrecer aos visitantes unha experiencia enriquecedora e educativa, combinando o gozar da contorna natural co descubrimento deste patrimonio cultural milenario. Esténdese ao longo de varios quilómetros e conecta os principais conxuntos de petroglifos, accesibles a través de carreiros ben sinalizados.

Yago, un camiñante da ruta cóntanos que "se chega a non facer tanto calor e traio unha botella de auga estaría como cabra no monte. Eu este roteiro volvería a facelo máis á tardiña que pola mañán que da demasiado o sol e non se ven ben os surcos nas rochas". "Non lle fixen caso ás guías que decían que había que vir ó amencer ou no solpol" explica rindo.

Luis, outro camiñante, díxonos que "pareceume unha ruta bonita, os petroglifos víanse un pouco regular, pero nótase que se esforzaron en atopalos e marcalos correctamente. Está entretida para facer, quizáis nun día con menos sol, pero moi bonita, bo contacto coa natureza".

A interpretación dos petroglifos é unha tarefa complexa e suxeita a diversas teorías. Moitos investigadores cren que estes gravados tiñan un significado relixioso ou cerimonial, actuando como símbolos de protección, mapas astrales ou rexistros de historias e mitos ancestrais. A presenza de figuras de caza e animais suxire tamén un vínculo cos ciclos naturais e as prácticas de subsistencia.

CONSERVACIÓN E VALOR CULTURAL

A conservación dos petroglifos é un desafío constante debido á súa exposición aos elementos meteorolóxicos e a posibles actos vandálicos. O valor cultural da Ruta dos Petróglifos de Teo é incalculable. Non só ofrece unha conexión directa cos nosos antepasados, senón que tamén enriquece a nosa comprensión da historia humana e convídanos a reflexionar sobre as formas en que as civilizacións antigas interactuaban coa súa contorna e expresaban as súas visións do mundo.