Os emigrantes, os "mellores embaixadores" de Galicia no mundo

O conselleiro de Emprego, Comercio e Emigración, José González, iniciou este xoves, coincidindo coa celebración do Día de Galicia, a viaxe institucional a Arxentina e a Uruguai para "seguir estreitando lazos coa comunidade galega do exterior", aos que reivindicou como os "mellores embaixadores" de Galicia no mundo.

Segundo explican nun comunicado, o Goberno galego continúa así traballando para "profundar nas necesidades dos galegos no exterior e recoñecer o seu gran labor como embaixadores". José González participará este xoves, xunto ao delegado da Xunta en Arxentina, Alejandro López Dobarro, no acto do 45º aniversario do Centro Galicia de Bos Aires e asinará no libro de honra da entidade.

Ademais, durante o evento gardarase un minuto de silencio en memoria das vítimas do palangreiro 'Argos Georgia', naufragado nas costas das Illas Malvinas. O conselleiro tamén terá a oportunidade de ver o cadro 'A derradeira lección do mestre', unha obra pictórica de Alfonso Daniel Rodríguez que foi pintada no ano 1945 en Buenos Aires e que forma parte dos fondos deste organismo.

Lembran que o Centro Galicia de Bois Aires é unha comunidade galega creada en 1980 que ten máis de 9.400 socios. A entidade, que conta co apoio da Xunta de Galicia a través de diferentes programas de axudas, está conformada por diversos grupos de baile, gaita, coro e teatro, escolas de música e baile tradicional galego, así como por numerosos equipos deportivos.

O conselleiro de Emprego, Comercio e Emigración, José González, arrinca a viaxe institucional a Arxentina e a Uruguai | Fonte: XUNTA DE GALICIA