O presidente da RAG enxalza a "ilusión" e a "esperanza" expresada por Castelao 76 anos despois da súa 'Alba de Gloria'

O presidente da Real Academia Galega (RAG), Víctor F. Freixanes, rememora este 25 de xullo a 'Alba de Gloria', histórico discurso do galeguista Alfonso Daniel Rodríguez Castelao pronunciado hai exactamente 76 anos en Buenos Aires. Nun artigo publicado na web da RAG, o seu máximo responsable enxalza a "sensación" de "ilusión e de esperanza" que imprimiu Castelao nesta alocución que é "un dos grandes discursos da cultura galega", lembrado e reproducido "centos de veces" sen perder "actualidade".

"Poucos textos tan brillantes, tan vivos, tan conmovedores e tan intelixentes como o do artista e político galeguista no exilio, a pesar dos setenta e seis anos transcorridos desde entón", subliña. Trátase, segundo escribe o presidente da RAG, dunha alegación "brillante polas imaxes que evoca", "vivo pola actualidade do discurso" e "pola capacidade de integrar espazos temporais e personaxes tan diversos, mais todos altamente significativos na construción da identidade de Galicia".

Ademais, é "conmovedor" porque se pronunciou cunha "distancia temporal" e rodeado de emigrantes e exiliados reunidos no Teatro Arxentino da capital porteña, "recentes aínda as feridas da guerra". Por tanto, "non é difícil imaxinar a emoción dos asistentes", que "máis de sete décadas despois chega aos nosos días", asegura Freixanes. Con todo, debuxa unha "paisaxe de festa, non de lamentacións" e está cheo desa "ilusión" e "esperanza", "algo que destacar nestes tempos de inseguridades e incertezas, mais nos que, non entanto, temos tantas cartas para xogar". "O futuro constrúese con esforzo e ousadía", continúa o presidente da RAG, que recalca, citando a Castelao, que a depresión "é reaccionaria" e "non leva a 'ningures'".

Víctor F. Freixanes, presidente da RAG | Fonte: RAG