O paro baixa un 9% no segundo trimestre e créanse 7.900 empregos

O paro baixou en 11.800 persoas en Galicia no segundo trimestre, un 9% menos que nos tres meses anteriores, polo que o desemprego rexistrado é de 119.800 persoas, cunha taxa do 9,5%, segundo os datos publicados polo Instituto Nacional de Estatística (INE) e o Instituto Galego de Estatística (IGE) este venres.

Pola súa banda, creáronse 7.900 empregos no segundo trimestre respecto do tres meses anteriores, de forma que a ocupación sitúase en 1.135.600 persoas. A taxa de ocupación elévase ao 48% (+0,4%).

En España, o paro baixou en 222.600 persoas no segundo trimestre do ano, o que supón case un 7,5% menos que no trimestre anterior, mentres que a ocupación aumentou en 434.700 postos de traballo (+2%), ata marcar un novo máximo de ocupados de case 21,7 millóns de persoas, informou este venres o Instituto Nacional de Estatística (INE).

MAIOR PARO FEMININO

Por sexos, con respecto ao trimestre anterior, diminúe tanto o paro masculino como o feminino. Os parados homes son 58.000 persoas (6.800 menos que fai tres meses) e o de mulleres é de 61.800 (5.000 paradas menos). Hai unha brecha de xénero que se observa en que a taxa de paro feminina é do 10,2%, máis elevada que o 8,9% entre os homes.

Por sectores, o sector primario sufriu unha destrución de 3.400 empregos no segundo trimestre, un 4,5% menos que o tres meses anteriores. En cambio, aumentou o emprego en 5.000 persoas na industria, así como 3.100 na construción e 3.000 ocupados máis no sector servizos.

FOGARES GALEGOS

Pola contra, os fogares galegos con todos os seus membros activos en paro son un total de 43.300 no segundo trimestre, o que supón 6.600 menos que no primeiro trimestre, un 13,2% menos, segundo os datos da Enquisa de Poboación Activa (EPA) publicados este venres.

Segundo o informe publicado polo Instituto Galego de Estatística (IGE) sobre a EPA, o número de fogares con todos os seus membros en activos redúcense en 3.600 na comparativa co mesmo trimestre de 2023, un 7,7% menos. En Galicia, hai un total de 1.125.900 fogares no segundo trimestre de 2024, 1.200 menos que tres meses antes (-0,1%), dos cales 764.400 teñen polo menos un activo (-0,6%).

REACCIÓNS

Reaccións diversas nos sindicatos galegos ante estes novos datos. A CIG pon o foco na "precariedade" do mercado laboral galego, con base nos últimos datos da Enquisa de Poboación Activa (EPA) do segundo trimestre, á vez que UGT fai un chamamento a crear emprego en sectores de alto valor engadido. Igualmente, CC.OO. ve "máis sombras que luces".

O PSdeG advirte de que Galicia sofre unha evolución do mercado labor "alarmantemente inferior" á da media española, xa que o desemprego sobe un 2,2% en Galicia no segundo trimestre na comparativa co mesmo período de 2023, o que contrasta cunha diminución de case un 2% no conxunto do país.

Nun comunicado, o portavoz de Economía e Emprego da Executiva do PSdeG, Abel Losada, apunta a unha "contundente valoración negativo" dos resultados de Galicia en termos de desemprego e ocupación.