Sanidade asegura que a asistencia sanitaria está "garantida neste momento" co plan de reforzo do verán
Gómez Caamaño acusa á oposición de facer "turismo rural sanitario".
Por Europa Press / Redacción | LUGO | 26/07/2024 | Actualizada ás 16:25
O conselleiro de Sanidade, Antonio Gómez Caamaño, asegurou este venres en Lugo que "a asistencia sanitaria está garantida neste momento" en toda a comunidade grazas ás medidas de reforzo da atención primaria postas en marcha pola Xunta de Galicia para a época estival e acusou a PSOE e BNG de dedicarse ao "turismo rural sanitario" mentres a Consellería, precisou, "traballa para xestionar os recursos". A valoración de Gómez Caamaño acerca da presión hospitalaria en Galicia durante o presente verán, de cuxa xestión realizou un "balance positivo", tivo lugar no marco da visita efectuada este venres polo conselleiro ás instalacións do Hospital Universitario Lucus Augusti (HULA) da capital lucense.
"Nunha situación de crise conseguimos saír adiante. Conseguimos sacar da manga máis de 450 profesionais sanitarios que moitos non contaban con que o conseguísemos", manifestou Antonio Gómez Caamaño, para acto seguido afear á oposición as súas críticas sobre a presunta falta de persoal sanitario existente aínda noutras áreas da provincia de Lugo. "Uns están na pancarta, no turismo rural sanitario e nós estamos na Consellería traballando para xestionar os recursos que temos", indicou respecto diso o conselleiro.
O titular de Sanidade aproveitou a súa visita ao HULA para destacar tamén as "boas prácticas clínicas" que ao seu xuízo están a levarse a cabo no complexo lucense co proxecto de inmunoterapia a domicilio e co do Hospital de Día de Procesos. Un "concepto innovador", este último, "centrado nas necesidades do paciente" e con impacto tanto na "eficacia" e "a comodidade" da atención como "en termos de sustentabilidade e aforro de gasto" para o sistema.
Dous modelos que a Xunta de Galicia, indicou, "valorará" transferir a outras áreas sanitarias galegas. "Aquí vimos ver unha boa práctica clínica e a intención é efectivamente transferir esas boas prácticas clínicas, dentro das singularidades de cada área sanitaria, a toda a poboación, pero iso depende de moitos factores", explicou.
