A Valedora do Pobo reclama á Xunta máis medidas contra os atrasos en dependencia
O pasado mes de febreiro, un informe da valedora a petición do Sindicato Labrego xa apuntaba unha demora cronificada na valoración da dependencia por parte da Consellería de Política Social e da aprobación do Programa Individual de Atención (PIA)
Por E.P. | SANTIAGO DE COMPOSTELA | 31/07/2024 | Actualizada ás 20:27
A valedora do Pobo, María Dores Fernández Galiño, pide máis medidas á Xunta para atallar os atrasos en atención á dependencia ante unha nova queixa do Sindicato Labrego.
O pasado mes de febreiro, un informe da valedora a petición do Sindicato Labrego xa apuntaba unha demora cronificada na valoración da dependencia por parte da Consellería de Política Social e da aprobación do Programa Individual de Atención (PIA). Agora, nun escrito con data de 10 de xullo, a valedora incide en que "moitas valoracións xa excedían o seis meses de prazo fixados no novo decreto 142/2023 que unificou os procedementos de valoración e aprobación do PIA.
Política Social recoñece á valedora do Pobo que "debido ao elevado número de solicitudes está a producirse unha acumulación de expedientes, o que provoca uns atrasos indiseables", os cales están "a procurar resolver".
A Consellería apunta a medidas como o plan de reforzo de persoal de atención á dependencia 2024-2027 e diferentes normativas para mellorar procedementos.
Con todo, a valedora constata que continúan os atrasos, polo que apunta que "deberá engadirse algunha outra medida que permita evitar os atrasos na determinación da dependencia e dos servizos ou prestacións que correspondan".
Respecto diso, o Sindicato Labrego acusa á Consellería de realizar só accións "de face á galería" na redacción de textos lexislativos, "sen mellorar realmente o seu fondo" ou "mesmo coando nestas modificacións cuestiones que demoran aínda máis os procesos de atención á dependencia e discapacidade".
