O stock na Denominación de Orixe Ribeira Sacra pode obrigar a 600 viticultores a non recoller a uva deste ano
UU.AA. critica a "inacción" da Xunta ante a acumulación de viño do pasado ano.
Por Europa Press / Redacción | SANTIAGO DE COMPOSTELA | 02/08/2024 | Actualizada ás 13:58
Unións Agrarias (UU.AA.) criticou a "inacción" da Consellería do Medio Rural ante o "grave problema" de acumulación de stock na Denominación de Orixe Ribeira Sacra. Nunha nota de prensa, o sindicato manifestou que, "a pesar das reiteradas chamadas de atención e peticións de intervención realizadas ao longo do último ano", a Xunta "segue sen mover ficha para buscar solucións" a unha problemática que, tal e como denunciou, comezou a evidenciarse xa na pasada vendima.
Así, ás portas desta nova campaña, produtores e adegas desta denominación de orixe enfróntanse a unha situación que, segundo Unións Agrarias, "pode obrigar a deixar sen recoller a uva duns 600 viticultores".
Neste contexto, o sindicato volveu a instar o Executivo galego a actuar "de inmediato" e a "activar os mecanismos necesarios para aplicar solucións que garantan a rendibilidade das adegas e viticultores desta denominación de orixe".
Nesta liña, expuxo que outras comunidades si habilitaron medidas. Pola contra, lamentou, nin a poda en verde nin a destilación de crises propostas nos últimos meses pola organización agraria "foron activadas pola Xunta". "Unha inacción que a día de hoxe sitúa aos viticultores da Ribeira Sacra nunha situación extrema que augura unha importante caída dos ingresos e pon contra as cordas a rendibilidade da actividade", manifestou.
UN SECTOR "ESENCIAL"
Por todo iso, Unións Agrarias considera "imprescindible" actuar para garantir a rendibilidade e o futuro dun sector "esencial" para a economía da comarca.Neste sentido, o sindicato fai un chamamento "á coherencia e á responsabilidade" e insta á administración autonómica a prestar a este sector "o apoio que necesita".
"Igual que cando outros sectores tiveron problemas tirouse de fondos públicos para axudalos a saír da fochanca, agora toca pór diñeiro encima da mesa para evitar o abandono das vides da Ribeira Sacra", aseverou antes de lembrar a candidatura a Patrimonio Mundial da Humanidade á que aspira a zona.
