A Axencia de Doazón de Órganos e Sangue leva a campaña 'Somos Olímpicos' ata Baiona
Unha unidade móbil de ADOS estará estacionada nesta rúa, na entrada ao Parador de Baiona, das 10:00 ás 14:00 e das 16:00 ás 21:00 horas para atender a todas as persoas que desexen participar.
Por Europa Press / Redacción | Santiago de Compostela | 05/08/2024 | Actualizada ás 11:16
A Axencia de Doazón de Órganos e Sangue (ADOS) levará este mércores ata a rúa Jesús Valverde de Baiona a campaña especial de doazón 'Somos Olímpicos'. Deste xeito, unha unidade móbil de ADOS estará estacionada nesta rúa, na entrada ao Parador de Baiona, das 10:00 ás 14:00 e das 16:00 ás 21:00 horas para atender a todas as persoas que desexen participar. Ademais, ao carón da unidade móbil disporase dunha montaxe alusiva aos Xogos Olímpicos e todos os doantes recibirán, como agasallo, unha camiseta coa lema da campaña.
Esta iniciativa desenvolverase en máis de vinte concellos galegos e forma parte da campaña especial de doazón de sangue nos meses de verán, un período especialmente sensible, xa que os meses estivais presentan dificultades engadidas para manter estable o volume de doazóns de sangue necesarias para o mantemento do labor asistencial dos hospitais galegos.
Todos os días, lembrou ADOS, son precisas entre 400 e 500 doazóns de sangue e, nos meses de verán, debido á deslocalización dos doantes habituais, é necesario reforzar o permanente chamamento á solidariedade que a Axencia traslada á cidadanía. O pasado ano 2023, Baiona obtivo un total de 404 doazóns de sangue, o que supuxo unha taxa de 33 doazóns por cada 1.000 habitantes e ano.
