Galicia lidera a compravenda de vivendas cunha alza do 10% en xuño, mes de caída xeneralizada en España
Con 1.718 operacións en xuño, Galicia destaca nun contexto de caídas xeneralizadas en outras comunidades.
Por Europa Press / Redacción | Santiago de Compostela | 05/08/2024 | Actualizada ás 11:32
A compravenda de vivendas aumentou un 10% en Galicia en xuño en comparación co mesmo mes de 2023, con 1.718 operacións. Supón o maior incremento entre comunidades nun mes de caídas xeneralizadas, segundo os datos que publica o Instituto Nacional de Estatística (INE) este luns.
E é que a compravenda de vivendas retrocedeu un 6,1% na media española, con só outras dúas comunidades en terreo positivos ademais de Galicia: Murcia (6%) e A Rioxa (0,3%). O maior esborralle é o de Canarias (-20,1%).
Das operacións de compravenda anotadas en xuño en Galicia, 1.670 realizáronse sobre vivendas libres e 48 sobre inmobles de protección oficial. Atendendo á antigüidade dos inmobles, 400 operacións corresponderon a vivendas novas e 1.318 estiveron relacionadas con edificios usados. En xuño realizáronse un total de 3.296 operacións sobre vivendas. Ademais das 1.718 compravendas, 809 foron herdanzas, 25 doazóns e sete permutas.
LEIRAS
En total, as leiras transmitidas en Galicia foron 8.074, das cales 5.974 son urbanas e 2.100, rústicas. Segundo título de adquisición nas urbanas, a repartición é o seguinte: 3.188 compravendas, 1.284 herdanzas, 52 doazóns, 26 permutas e 1.424 doutro tipo. As 2.100 transmisións sobre leiras rústicas foron: 869 herdanzas, 686 compravendas, 496 doutro tipo, 28 doazóns e 21 permutas.
DATOS ESTATAIS
A nivel estatal, a compravenda de vivendas rexistrou o pasado mes de xuño un descenso do 6,1% con respecto ao mesmo mes de 2023, ata un total de 50.099 operacións. Co descenso de xuño, a compravenda de vivendas segue rexistrando por segundo mes consecutivo taxas negativas, despois do esborralle que experimentou en maio, do 21,5%.
O descenso interanual da compravenda de vivendas en xuño debeuse, principalmente, á caída das operacións sobre vivendas usadas, que diminuíron un 7,8% interanual, ata as 39.890 operacións. No entanto, as transaccións realizadas sobre pisos novos aumentaron un 0,9%, ata as 10.209.
