Atopa na casa do seu avó unha granada de morteiro e nove foguetes antigranizo da Guerra Civil

Os Técnicos Especialistas en Desactivación de Artefactos Explosivos (TEDAX) da Garda Civil, en colaboración con axentes de Noia, desactivaron unha granada de morteiro e nove foguetes antigranizo atopados nesta localidade.

Foi un particular o que chamou á Garda Civil para informar de que, mentres realizaba a limpeza do trasteiro do seu defunto avó, localizara unha granada de morteiro, tipo Valero, de 50 mm de calibre, correspondente á pasada Guerra Civil Española, así como nove foguetes antigranizo de fabricación nacional e en mal estado de conservación.

Tras recibir a información, unha patrulla desprazouse ao lugar para verificar a situación. Posteriormente, o equipo especializado TEDAX da Coruña fíxose cargo da incidencia e procederon á desactivación controlada dos 10 artefactos nunha canteira da mesma localidade.

A Garda Civil aproveitou estes feitos para facer un chamamento á cidadanía para que non manipule obxectos sospeitosos e, en caso de atopar artefactos que poidan ser perigosos, informe de inmediato ás forzas de seguridade.

Explosivos da Guerra Civil localizados nunha vivenda de Noia.. GARDA CIVIL