Nomes de animais, IA, música tradicional e fanzines na 'IX Xornada de Onomástica Galega'
Por Europa Press / Redacción | SANTIAGO DE COMPOSTELA | 06/08/2024 | Actualizada ás 13:00
A Real Academia Galega abriu este martes o prazo de inscrición do 'IX Xornada de Onomástica Galega', que terá lugar o 19 de outubro no Museo de Pontevedra baixo o título 'Os outros nomes'. A edición deste ano virará ao redor da ciencia, a intelixencia artificial, a música tradicional e os fanzines, así como aos nomes "que lles impoñen na actualidade aos animais de compañía".
O encontro anual do Seminario de Onomástica da Real Academia Galega (RAG), que se organiza en colaboración coa Deputación de Pontevedra e o Museo de Pontevedra, estará coordinado un ano máis polas académicas Ana Boullón e Luz Méndez. Segundo explicou a RAG nun comunicado, estas xornadas constitúen unha "cita ineludible" no campo dos nomes propios e, cuxa IX edición, porá o foco no estudo de "outras ramas distintas ás principais desta ciencia".
"Son os nomes propios que reciben outros elementos bautizados polo ser humano: animais, obxectos persoais e comunitarios, conceptos culturais, descubrimentos da ciencia... O estudo destes nomes baséase, non tanto na etimoloxía das palabras usadas para nomear, senón nas referencias que nos definen como pobo e que nos encadran nas culturas do noso ao redor", detallou.
Por outra banda, as sesións desta edición celebraranse desde as 10.00 ata as 18.30 horas no salón de actos do Edificio Castelao, e aquelas persoas que queiran acudir deben enviar un correo electrónico antes do 16 de outubro a publicaciones@academia.gal e indicar o seu nome, apelidos, DNI e número de teléfono.
PROGRAMACIÓN IX XORNADA DE ONOMÁSTICA GALEGA
A ciencia será a protagonista da primeira metade da mañá e será o neurofisiólogo e comunicador científico Xurxo Mariño o encargado de abrir o programa cunha intervención titulada 'Da víbora de Seoane á estrela Rosalía'.
Así mesmo, Martin Pawley, da Agrupación Astronómica Coruñesa falará sobre "os nomes galegos do ceo e dos seus referentes", entre outras cuestións. Deste xeito, Noelia García Díaz, Elisa Fernández Rei, Adina Ioana Vladu e Carmen Magariños Igrexas, do Instituto da Lingua Galega, profundarán no caso da intelixencia artificial e nas formas de denominala.
Será a partir das 13.00 horas cando Noemí Basanta profundará "nas denominacións dos grupos de pandereteiras" e ás 13.30 terá lugar a intervención de Ramón Mariño Fernández sobre os apelativos nos fanzines galegos desde 1990 ata a actualidade.
Finalmente, Anxos García Fonte presentará ás 16.30 horas unha aproximación aos "usos contemporáneos nos nomes de animais desde a escola" e ás 17.30 horas será a quenda do poeta Celso Santamartín, cunha actuación titulada 'Dicir o nome e esperar o eco'.
