A situación de Renfe xa é insostible: a Xunta urxe aclaracións sobre as múltiples incidencias na liña Madrid-Galicia

O conselleiro de Presidencia, Xustiza e Deportes, Diego Calvo, queixouse este mércores da falta de información que ten a Xunta en relación ás incidencias que afectan os pasaxeiros que utilizan a liña ferroviaria de alta velocidade que conecta Madrid con Galicia. En declaracións aos medios, un día despois de que transcendese que Renfe pedirá compensacións económicas a Talgo polos fallos nos seus trens, Calvo lembrou, en declaracións, que a Xunta pediu en varias ocasións un contacto que explique a situación ao Executivo que dirixe Alfonso Rueda.

"Desde a chegada do AVE ao resto de cidades galegas (ademais de Ourense) estamos a sufrir numerosos atrasos e contratempos en todas e cada unha das expedicións, dá igual o sentido. E o que necesitamos é información", advertiu. Non en balde, recoñeceu que, aínda que "é normal" que "algunha vez poida fallar algún tren", non que, durante varios meses, "case todas as expedicións teñan problemas".

"E que cheguemos a situacións como as que se viron esta última semana, cando os viaxeiros dunha liña que non era a Galicia tiveron que romper os portelos porque quedaron encerrados sen luz, sen calefacción e a 40º dentro dun túnel", exemplificou. "Por tanto, creo que se necesitan aclaracións canto antes por parte do Ministerio (que dirixe Óscar Puente) e de Renfe. E nós agradeceriamos que o secretario de Estado, tal e como se comprometeu no seu momento, nos dese o nome da persoa responsable en Renfe coa que podemos falar para ter información sobre estas incidencias", concluíu.