O emprego no sector turístico cae un 3 % en Galicia entre abril e xuño, ata 126.179 traballadores
Deste total, 96.182 persoas eran asalariadas, un 5,4 % menos, e 29.998, autónomos, subindo un 5,6 %, segundo os datos difundidos este xoves por Turespaña a partir da Enquisa de Poboación Activa (EPA) que elabora o Instituto Nacional de Estatística (INE).
Por Europa Press / Redacción | Santiago de Compostela | 08/08/2024 | Actualizada ás 11:15
Galicia contabilizou no segundo trimestre do ano 126.179 ocupados vinculados a actividades turísticas, o que supón un 3 % menos que no mesmo período de 2023, segundo os datos difundidos este xoves por Turespaña a partir da Enquisa de Poboación Activa (EPA) que elabora o Instituto Nacional de Estatística (INE).
Deste total, 96.182 persoas eran asalariadas, un 5,4 % menos, e 29.998, autónomos, subindo un 5,6 %. A nivel nacional, España superou no segundo trimestre do ano os 2,97 millóns de ocupados vinculados a actividades turísticas, o que supón un incremento interanual do 3,5 % e 101.008 empregados máis que no mesmo período de 2023.
Deste xeito, os empregados no sector turístico no período comprendido entre abril e xuño de 2024 constituíron o 13,7 % do emprego total da economía española. Pola súa banda, os traballadores activos en turismo no segundo trimestre do ano superaron o tres millóns (3.264.381), un 4,3 % máis que en período equivalente de 2023. Ademais, a porcentaxe de parados sobre activos en actividades turísticas foi do 9,1 % e segue estando por baixo da taxa de paro da economía nacional (un 11,3 %).
AUMENTO DO EMPREGO EN TODAS AS RAMAS
Entre abril e xuño de 2024, as principais actividades turísticas creceron, cun aumento do 4 % na hostalaría debido á evolución positiva tanto dos servizos de comidas e bebidas (+3,5 %) como dos servizos de aloxamento (+5,3 %). Polo seu lado, no transporte de viaxeiros a variación interanual foi do 8,6 %, e nas axencias de viaxe, do 8 %. O crecemento principal deste segundo trimestre deuse entre os asalariados (3,9 % máis), que en termos absolutos ascenderon ata os 2.474.024.
Estes asalariados mostraron aumentos, ademais, no transporte de viaxeiros (+7,2 %) e na hostalaría (+5,2 %). Así mesmo, os asalariados no sector turístico con contrato indefinido (83,9 %), unha das variables que marcan a mellora na calidade do emprego no sector, aumentaron un 8,4%, o que supón a decimosegunda subida consecutiva. Pola súa banda, os asalariados con contrato temporal rexistraron un descenso do 14,5 %, o que levou que a taxa de asalarización aumentase un 0,3 % interanual, ata o 83,4 %.
DESCENDE A TAXA DE TEMPORALIDADE
A taxa de temporalidade no sector turístico foi do 16,1 %, unha cifra inferior á do mesmo período do ano anterior, que foi do 19,6 %. Desta forma, a taxa de temporalidade do sector turístico sitúase practicamente ao mesmo nivel que a taxa de temporalidade da economía nacional no seu conxunto, que é do 16 %.
En relación ao tipo de xornada, os asalariados con xornada completa representaron o 75,2 % do total de asalariados e aumentaron un 4,4 %. Pola súa banda, os autónomos ascenderon un 1,8 % respecto ao mesmo período de 2023, chegando aos 491.155 traballadores nesta modalidade de emprego.
COMUNIDADE VALENCIANA, A QUE MÁIS CRECE
As comunidades autónomas que rexistraron un maior número de ocupados de abril a xuño son Cataluña (523.569 ocupados e un crecemento interanual do 7,4 %), Madrid (461.196 e un aumento do 4,8 %), Andalucía (470.956 e un crecemento do 3,7 %) e Comunidade Valenciana (312.714 e un aumento respecto ao mesmo período do 2023 do 11,8 %).
Neste período creceu o número de ocupados en todas as rexións, excepto en Canarias, Galicia, País Vasco, Murcia, Navarra, A Rioxa (co maior descenso, do 22,8 %), Ceuta e Melilla. E doutra banda as comunidades autónomas onde máis creceu o número de ocupados foron Comunidade Valenciana, cun aumento, xa mencionado, do 11,8 % interanual; e Asturias, cun ascenso do 11,3 %.
