Visita a Carballedo: O papel clave dos CRFS na recuperación de fauna autóctona
Marisol Díaz subliña a importancia dos centros para o coidado de animais feridos e a súa posterior reintegración no medio natural.
Por Europa Press / Redacción | Santiago de Compostela | 09/08/2024 | Actualizada ás 17:18
A directora xeral de Patrimonio Natural, Marisol Díaz, puxo en valor este venres o labor que leva a cabo nos catro centros de recuperación de fauna silvestre (CRFS) que xestiona a Xunta e agradeceu ao persoal técnico e veterinario que traballa neles a súa entrega e contribución á protección da biodiversidade galega.
Durante unha visita ao centro de Carballedo, localizado no municipio pontevedrés de Cerdedo-Cotobade, a responsable autonómica incidiu no papel fundamental que exercen estas instalacións para ofrecer un coidado idóneo e traballar na recuperación dos exemplares de fauna silvestre autóctona que non estean en condicións de subsistir por si mesmos no medio natural debido a causas tales como traumatismos, enfermidades, intoxicación, astenia ou caída dos niños, entre outras.
A maiores, Marisol Díaz explicou que o obxectivo final dos CRFS é buscar a reintegración destes animais no seu hábitat no momento en que haxa garantías de que se poidan alimentar, reproducir e evitar aos seus predadores, precisando que se isto non chega se é posible, o obxectivo é lograr a súa inserción en programas de conservación ou de educación ambiental.
O centro de recuperación de fauna pontevedrés é un do catro existentes en Galicia que están baixo a xestión da Xunta. Así, ás instalacións de Carballedo súmanse as de Santa Cruz, no concello coruñés de Oleiros; as do Alto do Rodicio, no municipio ourensán de Maceda; e as de O Veral, localizadas en Lugo.
Durante o ano 2023 os catro centros galegos recibiron e atenderon a un total de 4.830 animais, a maioría deles aves, aínda que tamén trataron un número importante de mamíferos e de réptiles.
