Ciclo de cinema árabe en Pontevedra do 2 a 5 de setembro

A mostra de cinema euroárabe 'Amal en Ruta' regresa a Pontevedra do 2 a 5 de setembro no Teatro Principal. Este martes tivo lugar, no consistorio, a presentación deste evento gratuíto. Foi a cargo da tenente de alcalde, Eva Villaverde, e David Rodríguez, representante da Fundación Araguaney-Ponte de Culturas, entidade que puxo en marcha fai máis de vinte anos este festival de cinema.

Segundo os organizadores, 'Amal en Ruta' é unha cita que xa está consolidada como un referente, fidelizando espectadores e xerando un debate crítico e actual sobre o mundo árabe e a súa achega á cultura universal.

Eva Villaverde sinalou que este ciclo de cinema "permítenos achegar o mundo árabe con toda a súa complexidade e toda a súa heteroxeneidade aos pontevedreses nun momento que eu creo que é especialmente necesario". A tenente de alcalde quixo destacar especialmente a situación que vive o pobo palestino ante o "masacre" que está a sufrir.

Pola súa banda, David Rodríguez explicou que este ano a lema da mostra é 'Ninguén está a salvo', que incide na idea de que "todos formamos parte das situacións que ocorren nunha beira e na outra e estamos implicados dalgunha maneira".

PROPOSTAS

Esta edición de 'Amal en Ruta' será a novena na cidade de Pontevedra e constará de cinco longametraxes (catro ficcións e un documental) que supoñen un percorrido polo mellor cinema árabe da actualidade. As películas proxectaranse ás 21.00 horas, no Teatro Principal, e todas teñen un considerable recoñecemento nos principais festivais de cinema internacionais.

O luns 2 de setembro, poderase ver a película 'Entre as figueiras'. Para o martes 3 de setembro está programada 'Conspiración no Cairo', de Tarik Saleh. O mércores 4 setembro, o público que acuda ao Principal poderá ver 'O home que vendeu a súa pel', da directora Kaouther Ben Hania. O xoves 5 de setembro proxectarase 'Pequena Palestina, diario dun asedio'. Será nun horario diferente ao resto da programación, ás 18.30 horas. Este documental, dirixido por Abdallah Al-Khatib conta como o distrito de Yarmouk, en Damasco, Siria, foi o campo de refuxiados palestinos máis grande do mundo ata 2018.

O réxime de Bashar Al-Assad considerábao un refuxio para rebeldes e terroristas, e comezou unha campaña de asedio sobre o territorio a partir do ano 2013. Neste escenario entra en xogo Abdallah Al-Khatib, que xunto aos seus amigos documentaron a vida cotiá dos habitantes asediados, dando lugar a esta película. A última película desta mostra verase tamén o 5 setembro, ás 21.00 horas, é 'O caftán azul', da directora Maryam Touzani. 

Presentación da Semana do Cinema Euroárabe AMAL 2022