Rueda rexeita "comportamentos incívicos" de turistas pero tamén a "turismofobia": "Catro non representan a miles".

O presidente da Xunta, Alfonso Rueda, rexeitou os "comportamentos incívicos" de turistas rexistrados en puntos como a cidade de Santiago, pero advertiu do risco de caer en discursos de "turismofobia" porque "catro desalmados non representan aos miles de persoas que chegan cada día" á meta do Camiño.

En declaracións aos medios este luns no Monte do Gozo de Santiago, o mandatario autonómico manifestou que "por suposto" que deben ser sancionados os comportamentos "incívicos" retratados na capital galega.

"Non me gusta ver a xente durmindo na Praza da Quintana, en Praterías; ou en comportamentos incívicos na Praza do Obradoiro", sinalou antes de advertir de que "a inmensa maioría" das persoas que chegan a Santiago "sabe comportarse" e finaliza "unha experiencia única" como o Camiño "con total civismo e difrutando" de Galicia.

"Non pensemos que tres ou catro desalmados representan ao conxunto dos miles de persoas que chegan cada día a Santiago de Compostela", incidiu Roda antes de rexeitar a "turismofobia" que , ao seu xuízo, supón "pensar que catro representan a catro mil" cando Galicia "sempre foi unha terra hospitalaria".

Nesta liña, remarcou que o turismo "interesa moitísimo" a Galicia, polo que censura "manifestacións de rexeitamento aos que veñen de fóra, simplemente, porque son de fóra".

TAXA TURÍSTICA EN SANTIAGO

Así mesmo, Rueda avanzou que "en poucas semanas" a Xunta responderá o Concello de Santiago sobre a súa petición de encontro para abordar a proposta de taxa turística deseñada polo goberno da capital galega que encabeza a rexedora nacionalista, Goretti Sanmartín.

O presente lembrou que a Xunta esperou "case nove meses" a que chegase "a proposta" do concello e que o seu executivo responderá "moito antes, con moita máis celeridade" á petición do goberno compostelán.

"Agora en apenas mes e medio está a reclamarnos esa resposta, que van ter moito antes, pero de forma estudada", engadiu antes de subliñar que o concello santiagués "sabe" as condicións que a Xunta "estableceu" para autorizar a creación desta taxa.

"Se se cumpren as condicións, a resposta pode ser afirmativa", afirmou Rueda, que puxo o foco en que se este imposto "vai adiante", o goberno santiagués será "tamén" o responsable de "solucionar" os problemas que poida xerar a súa aplicación.

DEMANDA EXPLICACIÓNS SOBRE O ACORDO CON CATALUÑA

O xefe do Goberno galego, Alfonso Rueda, reclamou a convocatoria dunha conferencia de presidentes para que o Executivo central explique ás comunidades o fondo do acordo de financiamento con Cataluña.

A preguntas dos xornalistas este mércores en Santiago, onde o dirixente popular censurou a falta de "convocatoria oficial" da conferencia de presidentes, que ve "lóxico", "imprescindible" e "inaprazable" que se reúna.

Ao seu xuízo, o presidente do Goberno, Pedro Sánchez, debe "explicar cousas" aos executivos autonómicos das que se "están decatando polos medios de comunicación" e que "non" gustan "absolutamente nada". "Así non se pode seguir, as cousas hai que facelas doutra maneira", manifestou Rueda.