Un traballo sobre os efectos do turismo para a economía galega, Premio Paz Andrade
O estudo conclúe que se ben o turismo ten efectos positivos sobre o conxunto da sociedade galega, son máis relevantes para os grupos con maiores niveis de renda, contribuíndo ao incremento da desigualdade.
Por Galicia Confidencial | Santiago | 16/12/2015 | Actualizada ás 13:44
O traballo de investigación ‘Tourism and income distribution: evidence from a developed regional economy’ é o gañador do Premio de Investigación en Economía de Galicia Valentín Paz Andrade. O xurado destacou o seu carácter innovador “ao abordar dende unha metodoloxía económica os efectos do turismo e, en concreto, a incidencia sobre as desigualdades internas a unha economía rexional”. Ademais, tamén destacou “o esforzo de construción dunha matriz de contabilidade social para medir os efectos obxecto de análise” e a inclusión de “recomendacións operativas de política económica que poden servir para mellorar a actuación dos poderes públicos neste campo”. Son autores deste traballo André Carrascal Incera e Melchor Fernández Fernández, que o publicaron en Tourism Management (2015), informa a Universidade de Santiago.
O traballo de Carrascal e Fernández conclúe que o se ben o turismo ten importantes efectos positivos sobre o conxunto da sociedade galega, polo incremento do nivel de benestar, estes efectos “son máis relevantes para os grupos con maiores niveis de renda —propietarios do capital e traballo cualificado—, contribuíndo ao incremento da desigualdade”. Como explicación a este efecto, os investigadores apuntan que o resultado obedece “a que a canle de transmisión do ingreso do turismo vía o factor capital domina o ingreso vía o factor traballo, e o sistema impositivo actual e a política de redistribución non permite corrixir o impacto directo da canle de ingresos”.
A edición 2015 do Premio Valentín Paz Andrade destacou tamén a “alta calidade de todos os traballos presentados”, facendo unha mención específica das súas publicacións finalistas ex aequo, a asinada por Carmen Gago Cortés e Isabel Novo Corti co título ‘Políticas inclusivas de vivienda a través de la actuación municipal en la erradicación del chavolismo. El realojo del poblado de Culleredo’, e ‘Human-ignited wildfire patterns and responses to policy shifts’ de M. I. Chas Amil, J. P. Prestemon, C. J. McClen e J. Touza.
O xurado encargado da avaliación das propostas presentadas a concurso presidiuno o reitor da USC, Juan Viaño, e integrárono a presidenta do Consello Económico e Social de Galicia, Corina Porro; o director do IDEGA, Xoaquín Fernández Leiceaga; o integrante do mesmo Instituto, Xoán Carmona Badía; Juan Gallego Fouz, en representación do Consello Económico-Social; os ex presidentes da Xunta de Galicia, os profesores Fernando González Laxe e Emilio Pérez Touriño; e o profesor da Universidade de Vigo, Alberto Gago Rodríguez.
