La Voz logra cambiar a tendencia das súas vendas
O diario coruñés aumenta vendas e difusión este outono, antes das eleccións. Con todo, as súas cifras seguen moi lonxe das previas á crise, ao igual que as de Faro. A difusión destes dous xornais caeu máis dun 23% dende que comezou a recesión.
Por Galicia Confidencial | A Coruña | 04/01/2016 | Actualizada ás 08:00
La Voz de Galicia tiña unha difusión de 78.736 exemplares en novembro de 2015, o que supón unha suba d0 4,6% fronte aos 75.228 números de hai un ano. Non é moito, pero de consolidarse este crecemento interanual suporía un significativo cambio de tendencia, pois até hoxe La Voz acumulaba, como a maioría do sector, caídas da difusión interanual en torno ao 6-7%. Un factor que pode contribuír a explicar estes bos resultados é a proximidade das eleccións, pero en todo caso os comicios non serviron para aumentar as cifras das competencia.
La Voz declarou en novembro a OJD unhas vendas de 31.646 exemplares, fronte aos 24.566 de hai un ano. Trátase dunha subida moi importante, de máis do 28% interanual e un dato moi relevante dado que a principios de ano a taxa de caída de vendas erá do 9,5% interanual.
Malia o rebote, cómpre ter en conta que as cifras están moi lonxe das de antes da crisis. La Voz pechara 2008 cunha difusión media de 102.859 exemplares diarios. É dicir, dende que empezou a recesión este xornal perdeu o 23,4% da súa difusión. En 2011, La Voz difundía 92.167 exemplares e vendía 48.643. Polo tanto, en tres anos a difusión caeu un 15% e as vendas un 34%.
Faro de Vigo segue a caer, pero a cabeceira do Grupo Prensa Ibérica volve a ser unha das que menos retrocede en difusión entre os principais diarios locais do Estado. En vendas no último ano perde un 8% (21.501 fronte 23.348) e en difusión un 6,6% (28.901 fronte a 30.924).
Ao comezo da crisis, en 2009, Faro vendía 29.380 exemplares e difundía 39.093. Polo tanto, dende aquela, perdeu un 26% das vendas e da difusión. En 2011, Faro difundía 37.875 exemplares, polo que a difusión en tres anos caeu un 23%.
