A Axencia de Coñecemento en Saúde estrea páxina web
A súa misión é integrar as diversas etapas da cadea de valor do coñecemento, dende a formación dos profesionais sanitarios e a investigación en saúde, ata a innovación e a avaliación de tecnoloxías.
Por Galicia Confidencial | Santiago | 11/01/2016 | Actualizada ás 09:30
A Axencia de Coñecemento en Saúde (ACIS), organismo de recente creación, dependente da Consellería de Sanidade, vén de poñer en funcionamento a súa páxina web, en galego e castelán, nos enderezos http://acis.sergas.es e http://acis.sergas.gal, usando así o dominio para España e o propio de Galicia.
A Axencia de Coñecemento en Saúde é unha entidade pública galega creada con vocación de converterse no elemento nucleador do ecosistema de coñecemento e innovación en saúde en Galicia. Trátase dun organismo que supón, segundo se sinala na súa propia páxina web, unha nova visión para afrontar os retos do coñecemento, a ferramenta máis valiosa dos profesionais sanitarios para o coidado da saúde. Deste xeito, a experiencia, a formación, a investigación, a innovación e as novas tecnoloxías garanten a mellora continuada da práctica sanitaria e é necesaria unha xestión integrada de todas elas para acadar a máxima obtención de valor cara ao paciente.
Integración
Tal e como se recolle no sitio web, ACIS é o instrumento ao servizo do sistema público de saúde de Galicia para que o coñecemento circule de forma óptima dende a súa orixe ata a súa transferencia á sociedade. Para logralo, integra nunha mesma cadea de valor a formación dos profesionais sanitarios; a coordinación da investigación en saúde; a innovación baixo un enfoque aberto para que os resultados cheguen do laboratorio á cama do paciente e tamén ao mercado, con retornos económicos que reverterán na sanidade pública; e, ademais, a avaliación de tecnoloxías para garantir a aplicación das máis novas baixo criterios de máxima seguridade e eficiencia.
Nesta recén estreada páxina web pódese ver un vídeo de preto de 3 minutos de duración explicativo das funcións da ACIS. Nel destácase que este organismo nace para tecer e alimentar a rede na que todos os profesionais do Sistema Público de Saúde de Galicia se forman, investigan, innovan, comparten experiencias e interactúan coa súa contorna. Neste contexto, ACIS traballa para que o coñecemento flúa de xeito eficiente, nun modelo de innovación aberto e cunha clara visión internacional.
En definitiva, ACIS pon en valor o talento e o coñecemento para lograr a excelencia e a máxima competitividade no ecosistema sanitario galego. O resultado é a mellora continúa no coidado das persoas.
