Kirk deixa a Galicia sen varios trens, avións e con refachos de vento de 150 km/h
Hai multitude de atrasos en trens e algúns deles cancelados, ao igual que conexións de voos na Coruña, Santiago e Vigo.
Por Europa Press / Redacción | SANTIAGO DE COMPOSTELA | 09/10/2024 | Actualizada ás 11:14
O exfuracán Kirk, xa convertido en borrasca, deixa en Galicia nas primeiras horas deste mércores refachos de ata 150 km/h, estradas alagadas e problemas no tráfico ferroviario e aéreo.
Segundo informou Adif, a circulación ferroviaria entre Padrón e A Escravitude estivo parada debido á caída dunha árbore sobre a infraestrutura e provocou atrasos de varios trens na liña que une A Coruña e Vigo. Ademais, a liña A Coruña - Ferrol, incluída a parada en Betanzos, está tamén cortada. Os transportes faranse por estrada.
Con todo, a responsable das infraestruturas ferroviarias informou hai uns minutos de que a circulación está interrompida agora entre Redondela e a bifurcación de Arcade pola caída doutra árbore. A incidencia afecta os trens que circulan entre Pontevedra e Vigo/Guillarei. Destacan que o persoal de Adif traballa para solucionar a incidencia canto antes.
CONEXIÓNS AÉREAS
As conexións aéreas tamén se viron afectadas, concretamente voos con orixe-destino Peinador (Vigo) e Alvedro (A Coruña). Air Europa cancelou este martes os voos entre Madrid e Vigo de primeira hora da mañá (6.40 e 10.40 horas) e os seus inversos, que despegaban ás 8.40 e 11.25 horas.
Tampouco despegaron os voos entre Madrid e A Coruña (6.40 horas) e o inverso das 11.10 horas. Entre as incidencias, destaca a voadura do tellado do polideportivo do instituto de Porto do Son (A Coruña), que obrigou a suspender as clases.
VENTOS DE ATA 150 KM/H
En terra, toda a comunidade está este mércores en alerta laranxa por fortes ventos, con refachos que poden chegar ata o 140 km/h. Este aviso permanecerá activo ata as 12.00 horas. Gran parte de Galicia está ademais en alerta do mesmo nivel por acumulación de precipitacións, que poden exceder os 40 l/m2 en 12 horas.
No mar, a situación é similar. Alerta laranxa na Costa da Morte e na costa da provincia de Pontevedra por mar de vento e ondas que poden oscilar entre o catro e o sete metros. As costas da Coruña e Lugo rexistran a alerta máis baixa, amarela, por mar de vento de forza entre 7 e 8 e por ondas de catro a cinco metros.
Polo momento, os refachos de vento máis fortes rexistráronse en Vimianzo (A Coruña), onde chegou a 149.3 km/h ás 04.50 horas. En Oia (Pontevedra), os ventos chegaron ao 147.6 km/h ás 8.30 horas. As precipitacións superaron en moitos puntos a previsión de acumulación. En Rois (A Coruña), acumuláronse 79.6 L/m2 e en Lousame (A Coruña), 62 L/m2.
En Santiago as maiores afectacións foron no conservatorio de música, coa caída dunha parte do tellado; no colexio de Fontiñas, onde a caída dunha árbore provocou a ruptura dunha lumieira; o tellado dunha empresa do polígono Costa Vella está afectado; e o Centro Sociocultural da Trisca perdeu algunha chapa.
