Baixan as demandas de ruptura matrimonial un 6,5% en Galicia durante o segundo trimestre do ano

O número de demandas de ruptura matrimonial (nulidades, separacións e divorcios) presentadas en Galicia no segundo trimestre deste ano foi de 1.419, fronte ás 1.517 que se rexistraron no mesmo período de 2023, o que supón un descenso do 6,5 por cento.

Pondo en relación as demandas de ruptura matrimonial coa poboación, a 1 de xaneiro de 2024, obsérvase que, por cada 100.000 habitantes, en Galicia contabilizáronse, no período estudado, 52,4 demandas fronte ás 52,6 de media estatal.

Segundo os datos feitos públicos hoxe pola Sección de Estatística do Consello Xeral do Poder Xudicial, e recolleitos polo Tribunal Superior de Xustiza de Galicia (TSXG) na comunidade descenderon os divorcios consensuados (de 877 a 809, un 7,8 %) e o non consensuados (de 605 a 578, un 4,5 %).

Pola súa banda, as separacións consensuadas pasaron de 24, no segundo trimestre de 2023, a 19, no mesmo período deste ano, mentres que das non consensuadas rexistráronse 13, fronte ás 8 do ano anterior. Entre abril e xuño non se contabilizaron peticións de nulidade matrimonial.

No segundo trimestre iniciáronse 191 procedementos de modificación de medidas consensuadas, un 13,2 % menos que nas mesmas datas de 2023. As demandas de modificación de medidas non consensuadas pasaron de 544 a 527, un 3,1 % menos.

En canto aos procedementos de garda, custodia e alimentos de fillos non matrimoniais, rexistráronse 313 demandas de modificación de medidas consensuadas, fronte ás 321 do segundo trimestre de 2023.

Isto supón un descenso do 2,5%. Ademais, houbo 366 demandas de modificación de medidas non consensuadas (396 o ano anterior), o que representa unha baixada interanual do 7,6 por cento.

Arquivo - Detalle dunha contraente asinando durante a celebración da súa voda. Ricardo Rubio - Europa Press - Arquivo | Fonte: Europa Press