Familias de nenos con enfermidades mentais denuncian o abandono da Xunta mentres están hospitalizados
Esixen a Educación formación presencial mentres están en hospitais.
Por Europa Press / Redacción | VIGO | 28/10/2024 | Actualizada ás 10:20
A plataforma de familias de nenos con enfermidades mentais, Adoece, esixiu á directora xeral de Ordenación e Innovación Educativa, Judith Fernández, formación presencial para os mozos hospitalizados, ao ser "imprescindible" para que poidan regular as súas emocións, "motivalos, axudalos a centrar a súa atención e que logren adquirir, polo menos, os mínimos esixibles para promocionar".
Todo iso por mor das últimas declaracións de Fernández nunha entrevista en 'Radio Voz', onde se referiu a que os nenos poderían recibir clases virtuais mentres estean ingresados na Unidade de Saúde Mental do Álvaro Cunqueiro.
"É totalmente imposible porque non poden, pola súa enfermidade, e por normas internas da propia unidade, facer uso deses medios", lembraron as familias nun comunicado, explicando que se os pacientes ingresan noutra planta si poden acudir á aula hospitalaria, pero "se ingresa na Unidade de Saúde Mental da segunda planta xa non recibe ningunha formación porque é unha unidade pechada, co cal, se lle priva dun dereito fundamental como é a educación a nenos que en xeral o seu estado é moi grave e están en idade obrigatoria de escolarización".
"A Consellería da que vostede é directora xeral non está a cumprir coa normativa vixente, non só coa Constitución senón tamén cos artigos 62.2 e 62.3 da ORDE do 8 de setembro de 2021 nos que se regula como debe ser a atención educativa domiciliaria e a hospitalaria respectivamente", criticaron as familias. Así mesmo, solicitaron atención educativa domiciliaria para os nenos que foron dados de alta pero que aínda non están preparados para volver ás aulas.
